Հոբելյանական համերգ՝ «Արամ Խաչատրյան» համերգասրահում

Ս. թ. դեկտեմբերի 17-ին՝ ժամը 19:00-ին, «Արամ Խաչատրյան» համերգասրահում տեղի կունենա Հայաստանի պետական ազգային ակադեմիական երգչախմբի հիմնադրման 75-ամյակին նվիրված հոբելյանական համերգ:

Համերգային ծրագրում կհնչեն՝ Կարա-Մուրզա «Լեպհո լե-լե», Կոմիտաս «Կուժն առա, գնա-գնա», «Ել-ել», Ա. Տիգրանյան «Անուշ» օպերայի նախերգանքը, Ռոսսինի «Վիլհելմ Թել» օպերայից հատված, Դևիս «The Wonders of this Hands», Բուրլեգ «Deep river», Պոլետտի «Les champs elyse'es», Չուխաջյան «Լեպլէպիճի» օպերայից հատվածներ, Բեթհովեն «Ֆանտազիա» դաշնամուրի, երգչախմբի և նվագախմբի համար, Հախինյան «Սայաթ-Նովա» կանտատ:

Համերգին մասնակցում են Հայաստանի պետական ակադեմիական երգչախումբը՝ գեղարվեստական ղեկավար և գլխավոր դիրիժոր Հ. Չեքիջյան, մենակատարներ՝ Արծվիկ Դեմուրչյան /սոպրանո/, Լիլիթ Զաքարյան /դաշնամուր/, Սոֆիա Բաղդասարյան /սոպրանո/, Սարգիս Աղամալյան /տենոր/, Պողոս Բիազբեկյան /բաս/, Արամ Թուրաբյանը /կոնցերտմեյստեր/:

Հայաստանի պետական երգչախումբը ստեղծվել է 1937 թվականին. 1961 թվականից երգչախմբի գեղարվեստական ղեկավարն է Հովհաննես Չեքիջյանը: Հայաստանի պետական երգչախումբը ստեղծման օրից բարձր կատարողական վարպետությամբ է ներկայացրել իր երգացանկը՝ Կոմիտաս, Եկմալյան, Կարա-Մուրզա, Տիգրանյան, Արամ Խաչատրյան, Առնո Բաբաջանյան, Ալեքսանդր Հարությունյան և բազմաթիվ այլ հեղինակների ստեղծագործություններ: Երգչախումբը ակտիվ գործունեություն է ծավալել Հայաստանի բոլոր շրջաններում, իսկ հայրենիքից դուրս՝ 180 քաղաքում հանդես է եկել շուրջ 820 համերգով: Նյու Յորքում, Լոնդոնում, Փարիզում, Պրահայում, Բեյրութում և այլուր երգչախումբը 27 լեզուներով երգել է հայ և միջազգային դասական կոմպոզիտորների ստեղծագործություններ:

1969 թվականից երգչախումբն ունի ակադեմիական կոչում, իսկ 1975 թվականից հանրապետության վաստակավոր կոլեկտիվ է:

Երգչախմբի գործունեությունը ծավալվել է մեծ կտավի ստեղծագործություններով՝ 65 սիմֆոնիկ նվագախմբերի մասնակցությամբ, որոնց թվում են Մոսկվայի Մեծ թատրոնի նվագախումբը, Սովետական Միության սիմֆոնիկ մեծ նվագախումբը, Մոսկվայի ֆիլհարմոնիայի ակադեմիական նվագախումբը, Սանկտ Պետերբուրգի վաստակավոր կոլեկտիվ ակադեմիական նվագախումբը, Նովոսիբիրսկի ակադեմիական սիմֆոնիկ նվագախումբը, Ուկրաինայի պետական սիմֆոնիկ նվագախումբը, Բելառուսի, Լատվիայի, Լիտվայի, Էստոնիայի պետական նվագախմբերը, նաև Բուդապեշտի, Վրոցլավի, Մարսելի, Կաննի և ուրիշ այլ քաղաքների սիմֆոնիկ նվագախմբերը՝ Հ. Չեքիջյանի գլխավորությամբ:

Երգչախումբն ունի Եկմալյանի և Կոմիտասի պատարագների խտասալիկիներ, որոնք սիրված են ամբողջ աշխարհում:Հայաստանի պետական երգչախումբի և Ռուսաստանի սիմֆոնիկ նվագախմբերի համատեղ գործունեության ձայնագրություններից մեկը Փարիզում արժանացել է Գրան Պրիի:

1980 թվականին Մոսկվայի կոնսերվատորիայի մեծ դահլիճում օլիմպիական խաղերի մշակութային միջոցառումների շրջանակներում' միության բոլոր անվանի խմբերի մրցակցության արդյունքում՝ Հայաստանի պետական երգչախմբի կատարմամբ հնչեցված Բեթհովենի 9-րդ սիմֆոնիան ճանաչվել է լավագույնը, որի արդյունքում դիրիժոր Հովհաննես Չեքիջյանն արժանացել է «Ժողովուրդների բարեկամություն» շքանշանին:

2012 թվականի փետրվարին Հայաստանի պետական ակադեմիական երգչախմբին շնորհել է «ազգային» կարգավիճակ: