Հայտնիների Iphone-ների ու Ipad-ների պարունակությունը

Ժամանակին քրքրում էինք հայտնիների բջջային հեռոխոսներն ու պարզում դրանց պարունակությունները :) Այժմ նախկին բջջայիններին փոխարինել են «ամեն ինչ անող» Iphone-ներն ու ժամանակակից այլ տեխնոլոգիաները: Տարաբնույթ հնարավորություններով Iphone-ներն ու Ipad-ները դարձել են մեր ու հայտնի մարդկանց կյանքի կարևորագույն մասը: Քրիստինեի, Էրիկի, Սոֆիի ու Աստղիկի Iphone-ների կամ Ipad-ների պարունակությանը esyes.am-ը ներկայացնում է ստորև: 

Քրիստինե Պեպելյան

Քրիստինե Պեպելյանն այլևս Iphone չունի. երգչուհու խոսքերով՝ այն «զոհվել» է, կոտրվել: «Դա սիրում էի խաղերի, Skype-ի համար, բայց հասկացա, որ այն կամակոր հեռախոս էր. քարտեր չուներ, ու անընդհատ պետք է իրեն ինչ-որ ծառայություններ մատուցեի, ծրագրեր քաշեի»: Երգչուհին այժմ Ipad է օգտագործում, որի մեջ վերջին շրջանում պահում էր իր մենահամերգի ծրագիրն ու երգերի հերթականությունը: Երգչուհու Ipad-ի էկրանն էլ մենահամերգի պաստառն է զարդարում: Ճիշտ է, Ipad-ը հնարավորություն է տալիս օգտվել նաև համացանցից, սակայն Քրիստինեն սոցիալական ցանցերում քիչ է լինում և շատ ակտիվ չէ վիրտուալ տիրույթում, երբեմն-երբեմն էլ Skype-ով է խոսում: Երգչուհու փոխանցմամբ՝ իր Ipad-ում մի շարք նկարներ կան, որոնց հեղինակն ինքն է: «Երգերի բաժին չունեմ. բառարաններ կան, չնայած շատ չեմ օգտվում, որովհետև անգլերենից չեմ բողոքում»,- հայտնեց Քրիստինեն:

Էրիկ

Էրիկ Կարապետյանի հետ խոսեցինք իր Iphone-ի մասին: Պարզվում է՝ երգիչը շատ է սիրում հատկապես այն ծրագրերը, որոնց միջոցով նկարի գույներն ու ֆոնն են փոխում, ինչ-որ էֆեկտներ տալիս: «Խաղեր չունեմ ու չեմ սիրում խաղալ, որովհետև շուտ եմ պարտվում»,- անկեղծ ասաց երգիչն ու հավելեց,- «կարդում եմ արտասահմանյան ամսագրեր՝ մեքենաների ու տղամարդկանց մասին: Չեմ սիրում իմ երգերը հեռախոսիս մեջ պահել, փոխարենն ունեմ Սթիվի Ուանդերի, Էրիկ Բենեթի և այլ արտասահմանցի կատարողների երգերը: Երգերիս տեքստերն եմ նաև պահում, որ պետք եղած ժամանակ կարողանամ օգտվել»: Էրիկի փոխանցմամբ՝ Iphone-ի էկրանին հիմնականում իր նկարներից մեկն է լինում:

Սոֆի Մխեյան

Երգչուհի Սոֆի Մխեյանն ունի և՛ Iphone, և՛ Ipad: Առաջինը հիմնականում ծառայում է որպես հեռախոս, իսկ երկրորդը՝ որպես «մինի համակարգիչ»: «Հեռախոսիս էկրանին ոչինչ չկա. խաղեր ունեմ, բայց գրեթե չեմ օգտվում. երգեր էլ չունեմ, բայց ծրագրեր կան, որոնցով լսում եմ: Իսկ Ipad-իս մեջ այսօրվա բոլոր նոր ու հետաքրքիր կատարողների երգերն ունեմ, օրինակ՝ Բեյոնսե, Ռիհաննա, Քրիս Բրաուն, ինչպես նաև հին սերնդից Լառա Ֆաբիան և այլն»: Երգչուհու փոխանցմամբ՝ հեռախոսի մեջ հայ կատարողներից երգեր չունի, սակայն համացանցով հետևում է նրանց գործունեությանը: Սոֆին ևս նշեց, որ օգտվում է Iphone-ի բոլոր այն ծրագրերից, որոնց միջոցով փոփոխում է նկարներն ու տեղադրում Facebook-ում: