Վրացիներն առաջին հերթին վրացի են, երկրորդ հերթին՝ եվրոպացի. Վրաստանի նախագահ

Վրացիներն առաջին հերթին վրացի են, երկրորդ հերթին՝ եվրոպացի: Այս մասին Վրաստանի նախագահ Միխեիլ Կավելաշվիլին հայտարարել է Radio Courtoisie-ին տված հարցազրույցում։

«Մենք եվրոպացիների հետ շատ ընդհանրություններ ունենք՝ մեր բնավորությունը, մեր ինքնությունը, մեր արժեքները՝ չնայած աշխարհագրական հեռավորությանը: Սրանք են այն նմանությունները, որոնք մեզ տանում են դեպի Եվրոպա։ Բայց ես կարծում եմ, որ մենք առաջին հերթին վրացի ենք, երկրորդ հերթին՝ եվրոպացի»,- ասել է նա:

«Չնայած մարտահրավերներին՝ Վրաստանը չի շեղվել իր ճանապարհից և չի հրաժարվել իր արժեքներից»,-ընդգծել է Կավելաշվիլին։

Վրաստանի հարաբերությունները Եվրամիության և ԱՄՆ-ի հետ սկսեցին վատթարանալ այն բանից հետո, երբ տեղական խորհրդարանն ընդունեց օրենք օտարերկրյա գործակալների մասին և հայտարարեց հանրապետության՝ ԵՄ-ին անդամակցելու շուրջ բանակցությունների դադարեցման մասին։ Արևմուտքը վրդովված էր նաև 2024 թվականի հոկտեմբերի 26-ին կայացած խորհրդարանական ընտրությունների արդյունքներով։ Իշխող կուսակցությունը՝ «Վրացական երազանք – Ժողովրդավարական Վրաստան», հաղթեց, սակայն ընդդիմությունը և նախկին նախագահ Սալոմե Զուրաբիշվիլին չճանաչեցին քվեարկության արդյունքները։