Եգիպտոսում մեկնարկեց Սահմանդրական հանրաքվեն

Եգիպտոսում այսօր տեղական ժամանակով 08:00-ին (10:00) սկսվել է քվեարկությունը նոր Սահմանադրության ընդունման համար. հայտնում է Agence France-Presse-ը:

Հանրաքվեն անցկացվելու է Կահիրեում, Ալեքսանդրիայում և երկրի ևս 8 նահանգներում: Քվեարկությունը կավարտվի ժամը 19:00-ին, որից հետո կհրապարակվեն նախնական արդյունքերը: Երկրի մնացած նահանգներում հանրաքվեն կանցկացվի դեկտեմբերի 22-ին:

Հանրաքվեն 2 փուլով անցկացնելու որոշումը ճարահատյալ քայլ էր, քանի որ երկրում չեն բավականացնում ընտրական տեղամասերում հերթապահող դատավորները: Կարգուկանոնը քվեարկության ժամանակ ապահովելու են 130 հազար ոստիկան և 120 հազար զինծառայող:

Նոր Սահմանադրության մեջ կատարվող փոփոխությունները բախումների պատճառ էին դարձել իշխող «Մուսուլման եղբայրների» և ընդդիմության միջև: Ընդդիմությունը կարծում է, որ Սահմանադրությունը կրճատում է քաղաքացիական ազատություններն ու իրավունքները՝ «հանուն կրոնական և բարոյական նորմերի»:

Հանրաքվեի նախաշեմին իրավիճակը հատկապես սրվել էր այն բանից հետո, երբ Եգիպտոսի նախագահ Մուհամմեդ Մուրսին երկրի հիմնական օրենքի՝ Սահմանադրական հռչակագրի մեջ փոփոխություններ էր կատարել, որոնք նրան անսահմանափակ լիազորություններով էին օժտում: Մի քանի շաբաթ Եգիպտոսում կատաղի բախումներ էին ընթանում Մուրսիի կողմնակիցների և հակառակորդների միջև:

Ընդդիմության ճնշման տակ Մուրսին ստիպված էր հրաժարվել իր լիազորություններն ընդլայնելու որոշումից, սակայն ընդդիմության մեկ այլ պահանջը՝ Սահմանադրական հանրաքվեի հետաձգումը, նա կատարել հրաժարվեց: