Ռասմուսենի հարցազրույցն Interfax գործակալությանը

ՆԱՏՕ-ի ղեկավար Անդերս Ֆոգ Ռասմուսենը Բրյուսելում նախարարների հետ հանդիպումից հետո Interfax գործակալությանը տվել է հարցազրույց, որտեղ անդրադարձ է կատարել աշխարհում տեղի ունեցող կարևոր դեպքերին:

Այսպես, Patriot հրթիռների մասին հարցին Ռասմուսենը հարցազրույցի ժամանակ նշել է, որ հակահրթիռային համակարգերի կառուցումը նպատակ ունի պաշտպանելու իր անդամ երկրների անվտանգությունը և ուղղված չէ Ռուսաստանի դեմ:

Interfax-ի այն հարցին, թե արդյոք նպատակահարմար է Աֆղանստանից խաղաղապահների հեռացումը, քանի որ դրանից հետո իշխանությունը կրկին կանցնի թալիբներին, Ռասմուսենը պատասխանել է, որ նրանք պատրաստվել են իրենց զորքերը դուրս բերել 2014 թվականից, երբ աֆղանական ուժերն արդեն հզոր ուժ կներկայացնեն: Կանխատեսվում է, որ նրանց թիվը կհասնի 350.000-ի:

Անդրադառնալով այն հարցին, թե Patriot հրթիռների տեղադրումն արդյոք կարող է օգտագործվել Թուրքիայի համար և արդյոք ՆԱՏՕ-ն սրանով չի միջամտի Սիրիայի հարցերին, պատասխանել է, որ Թուրքիան մեր դաշնակից պետությունն է և ՆԱՏՕ-ի բոլոր պետությունների պարտավորությունն է պաշտպանել իր անդամ երկրին և ավելացրել է, որ այն միայն պաշտպանական նպատակներ ունի և կարող է օգտագործվել միայն այդ նպատակներով: Անդրադառնալով Սիրիայում Բաշար Ասադի կառավարության անկմանը` Ռասմուսենը պատասխանել է, որ վերջինիս տապալումն ակնհայտ է, և այն միայն ժամանակի հարց է: