«Ժառանգության» խոսնակը` Լևոն Զուրաբյան-Վարդան Օսկանյան զրույցի գաղտնալսման մասին

Այսօր լրատվամիջոցներում է հայտնվել ՀԱԿ համակարգող Լևոն Զուրաբյանի և ԲՀԿ-ական պատգամավոր, նախընտրական ցուցակի երկրորդ համար հանդիսացող Վարդան Օսկանյանի միջև սրճարանում տեղի ունեցած զրույցի ձայնագրությունը: Զրույցի ընթացքում հնչած մտքերի և դիրքորոշումների կապակցությամբ Lurer.com-ը մեկնաբանություններ խնդրեց «Ժառանգություն» կուսկացության մամուլի խոսնակ Հովսեփ Խուրշուդյանից, ով սակայն չցանկացավ մեկնաբանել գաղտնալսման արդյունքում ձեռք բերված տեղեկությունը, բայց դատապարտեց այն.

«Ես չեմ ցանկանում մեկնաբանել գաղտնալսման արդյունքում ձեռք բերված որևէ տեղեկություն: Անգամ դատարանում` ոչ օրինական ճանապարհով ձեռքբերված փաստերը հաշվի չեն առնվում»,- ասաց վերջինս և հավելեց,- «Մենք խստորեն դատապարտում ենք քաղաքական նպատակներով ցանկացած անպարկեշտ,  ապօրինի մեթոդների կիրառումը, տվյալ դեպքում' մասնավոր և հրապարակման ոչ ենթակա զրույցի գաղտնալսումը, անկախ այն բանից, թե ով է դա իրականացրել: Ես նաև ուզում եմ հիշեցնել, որ նման բան եղել է նաև 2007թ.-ին, և կրկին նախագահական ընտրություններից առաջ` կիրառվել է մեկ այլ, այն ժամանակ ընդդիմադիր քաղաքական ուժի ներկայացուցչի' Արթուր Բաղդասարյանի դեմ, ինչը մենք ևս դատապարտել ենք»: