Արա Օհանյանին բռնության ենթարկելու դեպքի առթիվ նախաձեռնված քրվարույթը դատախազության ցուցումով կարճվում է․ փաստաբան

Փաստաբան Ռոման Երիցյանի գրառումը․

«ՀՀ քննչական կոմիտեի խոշտանգումների քննության վարչությունից Արա Օհանյանին տեղեկացրել են, որ ոստիկանության աշխատողների կողմից վերջինիս բռնության ենթարկելու դեպքի առթիվ նախաձեռնված քրեական վարույթը դատախազության ցուցումով կարճվում է՝ ապացույցների անբավարարության հիմքով։

Հիշեցնում եմ, որ երեք ամիս առաջ Արա Օհանյանն ահազանգել էր՝ նշելով, որ գողության դեպքն իր վրա չվերցնելու պատճառով ՀՀ ՆԳՆ ոստիկանության Չարենցավանի բաժնի պետի տեղակալի և ոստիկանության մի քանի այլ ծառայողների կողմից դաժանաբար ենթարկվել է ֆիզիկական ու հոգեկան բռնության, ինչի հետևանքով մի քանի օր շարունակ բուժում է ստացել հիվանդանոցային պայմաններում։

Հետաքրքիրն այն է, որ քննչական կոմիտեն ու դատախազությունը անբավարար ապացույցների մասին են խոսում միայն խոշտանգման կամ պաշտոնատար անձանց կողմից բռնություն գործադրելով լիազորությունները չարաշահելու կամ անցնելու հանցագործություններով։ Ապացույցների անբավարարության հիմքով անձանց մեղադրանք չի առաջադրվում, քրեական վարույթն էլ կարճվում է այն դեպքում, երբ այդ նույն ապացույցների ամենահետաքրքիր մասը տնօրինում են հենց ենթադրյալ հանցագործները (կոնկրետ դեպքում՝ ոստիկանները), որոնց համար էլ դրանք վերացնելը վայրկյանների հարց է։

Հիմա եթե մի ուրիշ դեպք լիներ (օրինակ չբերեմ՝ ինչպիսի դեպք), ապա է´լ խուզարկություններ, է´լ դիտումներ, է´լ գաղտնալսումներ, է´լ ձերբակալումներ, է´լ կալանքներ։ Ինչեր ասես, որ չէին անի, այն էլ ինչ-որ անհայտ օպերատիվ տվյալի կամ զեկուցագրերի հիման վրա։ Բայց կոնկրետ և նմանատիպ բազմաթիվ դեպքերով, երբ կա խոշտանգման մասին հստակ հաղորդում, անձի խոշտանգման ենթարկված լինելու մասին վկայող բժշկական փաստաթղթեր, տուժողի ցուցմունք, վերջինիս առաջին օգնություն ցուցաբերած և հիվանդանոց տեղափոխած անձանց ցուցմունքներ, ոստիկանությունից հալածված դուրս գալու տեսարանին ներկա անձանց ցուցմունքներ, մարմնական վնասվածքների հետքեր, առերեսման ընթացքում հստակ հերքումներ, նմանատիպ դեպքերի վերաբերյալ բազմաթիվ այլ անձանց հայտարարություններ ու հաղորդումներ, զարմանալի պայմաններում անհետացած տեսագրությունների փաստեր, որևէ մեկը չի ձերբակալվում, որևէ մեկին մեղադրանք չի առաջադրվում և որևէ մեկի պաշտոնավարում չի կասեցվում։ Փոխարենը՝ բավականին ուշացումով նախաձեռնվում է քրեական վարույթ, մոտ 2-3 ամիս տարվում ահավոր պասիվ նախաքննություն, մերժվում վարութային ու քննչական գործողություններ իրականացնելու մի շարք միջնորդություններ, իսկ վերջում է եզրափակվում դասական եղանակով»։