ՀՖՖ-ն փորձում է ֆան շարժումների հասանելիք տոմսերը Վրաստանի խաղին դարձնել առևտրի կամ սակարկման առարկա. ՖԱՖ

First Armenian Front (FAF)-ը հայտարարություն է տարածել՝ անդրադառնալով Ազգերի լիգայի Հայաստան-Վրաստան առաջիկա խաղին: 

«Հայաստանի ֆուտբոլի ֆեդերացիան գնում է կեղտոտ ճանապարհով մեծ սադրանքի՝ փորձ անելով Հայաստանի հավաքականի ֆան շարժումներին հասանելիք տոմսերը մեր ընտրանու առաջիկա սկզբունքային խաղին դարձնել առևտրի կամ սակարկման առարկա։ Այս պահին մարզադաշտի տոմսարկղից պատասխանում են, որ անհայտ է ֆան շարժումների տոմսերի ճակատագիրը։

Սա այն պարագայում, երբ մրցակցի՝ Վրաստանի հավաքականի երկրպագուների հետ շփումների արդյունքում պարզ է դառնում, որ իրենց ֆան շարժմանը տրվել է ամբողջ հյուրերի սեկցիան շուրջ 900 տեղ, նաև լրացուցիչ շուրջ 1500 տեղ հյուրերի սեկցիայի հարևանությամբ, իսկ ընդհանուր առմամբ վրացի երկրպագուների կողմից երևանյան խաղի համար կա տոմսերի մի քանի հազարի հասնող պահանջարկ, որի արդյունքում սպասվում է յուրաքանչյուր տրիբունայում բացմաթիվ վրացի երկրպագուների ներկայություն՝ սև շուկայից ձեռք բերված տոմսերով։

Այսինքն մարզադաշտում սպասվում է մրցակից թիմի բացարձակ ռեկորդային ներկայություն, ինչի արդյունքում ողջ խաղի արդյունքում լսվելու են մեծամասամբ վրացի երկրպագուների ձայները, մեր ընտրանու ֆուտբոլիստները չեն զգալու, որ սեփական մարզադաշտում են խաղում, ավելի տխուր և ոչ արժանապատիվ պատկեր հնարավոր չէ պատկերացնել։

Ֆան շարժումների տոմսերը չտրամադրելով՝ ՀՖՖ-ն կանցնի հնարավոր բոլոր կարմիր գծերը՝ զոհաբերելով հավաքականը հանուն աթոռից կառչելու հերթական փորձի։ Այս գործելաոճը բնութագրում է նրանց վերաբերմունքը ազգային հավաքականին և մեր ընտրանու արդյունքներին։

Եթե ՀՖՖ-ն որոշում կայացնի ֆան շարժումների սեկցիաների տոմսերը մասնակի կամ ամբողջական հանել ազատ վաճառքի, Վրաստանի դեմ խաղի հետևանքների ողջ պատասխանատվությունը ընկնելու է ՀՖՖ ղեկավարության ուսերին»։

Նշենք, որ Հայաստան-Վրաստան ֆուտբոլային հանդիպումը կայանալու է մարտի 20-ին, սակայն Հայաստանի ֆուտբոլի ֆեդերացիայի կայքում տոմսերը դեռևս հասանելի չեն՝ նշումով, որ վաճառքը կմեկնարկի շուտով, մինչդեռ Վրաստանում մարտի 23-ին կայանալիք հանդիպման տոմսերն արդեն սպառված են: