Սպիտակի երկրաշարժի ժամանակ կարելի էր ավելի շատ մարդ փրկել, եթե...

Դեկտեմբերի 17-ին ՀՀ ԱԻ նախարարության նիստերի դահլիճում տեղի ունեցավ «Հայաստանի Երևան և Գյումրի քաղաքներում սեյսմիկ պաշտպանության վարքականոնների ուսուցում և վարժանքներ ծրագրի» շրջանակներում կազմակերպված աշխատանքային հանդիպում: Ծրագիրն իրականացվում է Հյոգոյի գործողությունների շրջանակային ծրագրի (ՀԳՇԾ) խթանմանն ուղղված 2012 թ. Աղետների նվազեցման ասիական կենտրոնի (ԱՆԱԿ) Համագործակցության նախագծի շրջանակներում:

Նախագծի պատասխանատու Ջունջի Մուրիկավին, գործադիր տնօրեն Կիյոշի Նատորիի անունից ողջունելով ներկաներին՝ մասնավորապես ասաց. «Տարերային աղետներից տուժողների թիվը տարեցտարի աճում է ամբողջ աշխարհում: Մենք ապրում ենք այդ աղետների ռիսկերի հետ և պետք է պատրաստ լինենք դրանց, քանի որ աղետների ռիսկերը շատ արագ են աճում: Այս առումով շատ կարևոր է աղետների կրթության ոլորտի զարգացումը»:

Հանդիպման ընթացքում «Սեյսմիկ պաշտպանության ծառայություն» գործակալության պետ Հրաչյա Պետրոսյանը համառոտ ներկայացրեց նախագծի կատարման ընթացքի մասին զեկույցը. «Հայաստանի Երևան և Գյումրի քաղաքներում սեյսմիկ պաշտպանության վարքականոնների ուսուցում և վարժանքներ ծրագիրը» մեր գործակալության և Աղետների նվազեցման ասիական կենտրոնի համատեղ նախագիծն է, որին աջակցել է Ճապոնիայի կառավարությունը, որի համար ցանկանում եմ հայտնել իմ շնորհակալությունն ու գոհունակությունը և հուսով եմ, որ մեր համագործակցությունը շարունակական կլինի»:

Իր զեկույցի ընթացքում Հ. Պետրոսյանը ներկայացրեց ծրագրի շրջանակներում իրականացված Երևանի 14 և Գյումրու 4 դպրոցներում անցկացված վարժանքների և տարհանման աշխատանքների արդյունքները, որոնց, ընդանուր առմամբ, ընդգրկվել է 2300 աշակերտ և 171 ուսուցիչ:

Շարունակելով թեման՝ ՀՀ ԱԻՆ ՓԾ տնօրենի տեղակալ, Հյոգոյի ծրագրի պատասխանատու, գնդապետ Նիկոլայ Գրիգորյանը ներկայացրեց երկու տեսահոլովակ, որոնցում արծարծված էր բնակչության իրազեկվածության մակարդակի բարձրացման խնդիրը: «Սպիտակի երկրաշարժի ժամանակ կարելի էր մինչև 7000-ով ավելի շատ մարդ փրկել, եթե մարդիկ և փրկարարներն ավելի իրազեկված լինեին: Այդ խնդիրը 1988 թվականից մինչ օրս քննարկվում է: Դա բոլորիս անվտանգության մշակույթի կարևորագույն մասնիկը պետք է լինի: Բնակչության իրազեկվածությունն ու պատրաստվածությունը պետք է դառնա հմտություն: Այս ոլորտում մենք արդեն մեծ ձեռքբերումներ ունենք՝ մասնավորապես Աղետների ռիսկի նվազեցման ազգային պլատֆորմի ստեղծումը և աղետների ռիսկի նվազեցման ազգային ռազմավարության մշակում: Այժմ մեր հայացքն ուղղված է դեպի մեր կարիքներն ու միջազգային փորձը»:

Հանդիպման վերջում Կոբեի համալսարանի միջազգային հետազոտությունների բարձրագույն դպրոցի դոցենտ Այկո Մակուրաին և Կատմանդուի Տրիբհուվան, ինչպես նաև համալսարանի պրոֆեսոր Վիշնու Դանգոլը կիսվեցին Ճապոնիայում և Նեպալում իրականացված սեյսմիկ պաշտպանության վարքականոնների և վարժանքների փորձով:

Հանդիպման արդյունքներն ամփոփելուց հետո կողմերի միջև պայմանավորվածություն ձեռք բերվեց շարունակել համագործակցությունը: