Վրաստանը Սև ծովը կվերածի Եվրամիության հետ միավորող կամրջի․ Վրաստանի ԱԳ նախարար

Վրաստանի իշխանությունները մտադիր են Սև ծովը Կամուրջ դարձնել Եվրամիության հետ։ Այս մասին հայտարարել է Վրաստանի արտաքին գործերի նախարար Մակա Բոչորիշվիլին Նյու Դելիում «Raisina Dialogue 2025» միջազգային համաժողովի շրջանակներում անցկացվող «Մրցակցություն և Համագործակցություն՝ հանուն անվտանգ ապագայի» քննարկման ժամանակ։ Այս մասին գրում է EADaily-ն։

«Երկար ժամանակ Վրաստանը մշտապես ձգտում էր Սև ծովը դարձնել Եվրամիության հետ միավորող կամուրջ, այլ ոչ թե բաժանող պատնեշ։ Այսօր մենք ունենք իրական հնարավորություններ այդ նպատակին հասնելու համար, բայց դա պահանջում է ակտիվ աշխատանք և ներդրումներ», - ասել է նախարարը։

Նրա խոսքով՝ կողմերը կարող են լայնածավալ նախագծեր իրականացնել, որոնք օգուտ կբերեն Եվրամիությանը և ողջ Եվրոպային։

«Մենք մեզ դիտարկում ենք որպես Եվրոպայի մաս, ուստի Եվրոպայի անվտանգության հարցերն ուղղակիորեն վերաբերում են մեզ։ Այս համատեքստում կարևոր է հաշվի առնել արևելյան ուղղության հսկայական ներուժը, որն օգուտ կբերի ամբողջ Եվրոպական տարածաշրջանին», - հավելել է Բոչորիշվիլին։

Համաժողովին մասնակցել են աշխարհի տարբեր երկրների ներկայացուցիչներ, այդ թվում՝ ԱՄՆ նախագահի ազգային անվտանգության հարցերով խորհրդական Թուլսի Գաբարդը:

Ինչպես հայտարարել է Բոչորիշվիլին, Raisina Dialogue-ը «շատ լավ հնարավորություն է Վրաստանի համար հրապարակայնորեն եւ բարձրաձայն հնչեցնելու իր դիրքորոշումը»: