Ալեն Դելոն. Ինձ պակասում է միայն սերը

Այսօր առաջին անգամ Հայաստանում էր ֆրանսիացի լեգենդար դերասան Ալեն դելոնը:

Դերասանը Հայաստան է եկել «Շնորհավո՛ր Ամանոր, մայրե՛ր» ֆիլմի պրեմիերային մասնակցելու համար:

Լրագրողների հետ հանդիպման ժամանակ նա խոստովանեց, որ թեև ընդամենը մի քանի ժամ է, ինչ ժամանել է, սակայն արդեն հասցրել է զգալ մեծ ջերմություն և սեր հայ ժողովրդի կողմից: Անգամ ՀՀ նախագահ Սերժ Սարգսյանի հետ հանդիպման ժամանակ ասել է, որ չէր պատկերացնում, թե իրեն այստեղ այսքան շատ են սիրում և գնահատում, անգամ իր ընկերը՝ Շառլ Ազնավուրը, այդ մասին չի ասել: Նախագահն ի պատասխան՝ Դելոնին ասել է, թե երևի Ազնավուրը չի ցանկացել, որ դերասանը մեծամտանա:

Քանի որ «Շնորհավո՛ր Ամանոր, մայրե՛ր» ֆիլմը ներկայացնելն էր պատրվակ դարձել դերասանի՝ Հայաստան ժամանման համար, նա խոսեց նաև իր մոր մասին և ասաց, որ եթե իր մայրը ողջ լիներ, ապա նա միմիայն կփորձեր հնարավորինս շատ լինել նրա հետ, նրա կողքին, և ասուլիսի մասնակիցներին ցույց տվեց իր մոր նվերը՝ խաչ, որի վրա Քրիստոսն էր, և ասաց, որ այն միշտ իր հետ է, քանի որ մայրը պատվիրել է չկորցնել:

Իսկ լրագրողի այն հարցին, թե մեծահամբավ դերասանին այսօր որևէ բան արդյոք պակասում է, նա պատասխանեց. «Շատ անձնական հարց է: Ես ամեն ինչ ունեցել եմ և ունեմ, սակայն ինձ պակասում է սերը»: