ՀՀ կառավարությունը հաստատել է զեկույցը

2006 թվականի մարտի 20-ին ՀՀ Ազգային ժողովն ընդունել է ՅՈՒՆԵՍԿՕ-ի 2003 թվականի հոկտեմբերի 17-ին ստորագրված «Ոչ նյութական մշակութային ժառանգության պաշտպանության մասին» կոնվենցիան վավերացնելու մասին որոշումը, որով որպես անդամ պետություն ստանձնել է դրա կիրարկումն ապահովելու ուղղությամբ միջոցառումներ ձեռնարկելու պարտավորություններ: Միաժամանակ, Կոնվենցիայի 29-րդ հոդվածի համաձայն՝ անդամ պետությունը պարտավոր է կոմիտեի կողմից հաստատված ձևով և պարբերականությամբ /6 տարին մեկ/ միջկառավարական կոմիտեին ներկայացնել օրենսդրական և կանոնակարգող դրույթների և այլ միջոցների մասին զեկույց, որոնք ձեռնարկվել են Կոնվենցիայի կիրարկման նպատակով:

2012 թվականի սեպտեմբերի 14-ի N 883 որոշմամբ ՀՀ վարչապետի որոշմամբ ստեղծվել է ՄԱԿ-ի կրթության, գիտության և մշակույթի կազմակերպություն ներկայացվելիք՝ Հայաստանի Հանրապետության «Ոչ նյութական մշա­կութային ժառանգության պաշտպանության մասին» կոնվենցիաների պարբերական զեկույցի մշակման նպատակով միջգերատեսչական աշխատանքային խումբ, որը պատրաստել և սահմանված կարգով ՀՀ կառավարության հաստատմանն է ներկայացրել զեկույցի նախագիծը:

2012 թվականի դեկտեմբերի 13-ի N 50 արձանագրային որոշմամբ ՀՀ կառավարությունը հաստատել է «Ոչ նյութական մշակութային ժառանգության պաշտպանության մասին» կոնվենցիայի կիրարկման և մարդկության ոչ նյութական մշակութային ժառանգության ներկայացուցչական ցանկում ներառված տարրերի կարգավիճակի վերաբերյալ Հայաս­տանի Հանրապետության պարբերական զեկույ­ցը:
Զեկույցի անգլերեն տարբերակը սահմանված կարգով ուղարկվել է Փարիզ՝ ՅՈՒՆԵՍԿՕ-ի կենտրոնակայան:

Ավելի քան 40 էջանոց փաստաթուղթը բաղկացած է տիտղոսաթերթից և 4 հիմնական բաժիններից, որոնցում հանգամանալից ներկայացված են ՀՀ-ում ոչ նյութական մշակութային ժառանգության պաշտպանությունը, զարգացումը և խթանումը ապահովելու նպատակով իրականացված պետական ծրագրավորված քաղաքականությունը: Մասնավորապես, նկարագրված է ոլորտի ինստիտուցիոնալ կառուցվածքը, իրավապայմանագրային դաշտը (տրվում է հավելվածով) և պետական պլանավորված քաղաքականությունը: Վերջին բաժինն ամբողջովին նվիրված է ՀՀ-ում առկա այն տարրերի ներկա կարգավիճակին, որոնք ներառված են ՅՈՒՆԵՍԿՕ-ի մարդկության ոչ նյութական մշակութային ժառանգության ներկայացուցչական ցանկում: