Հայ-ճապոնական համատեղ ձեռնարկ. տեքստիլի պահպանմանն ու վերականգնմանը նվիրված սեմինար

2011 թ. ապրիլին Իկուո Հիրայամյի անվան «Մետաքսի ճանապարհ» թանգա­րանը, Ջոշիբի Արվեստի և դիզայնի համալսարանի ասպիրանտուրայի դասախոս, գործվածքի վերականգնող Միե Իշիիին տրամադրել է դրամաշնորհ՝ Հայաստանում պատմական գործվածքի պահպանման վիճակը հետազոտելու նպատակով: Հայաստանում Միե Իշիին այցելել է գործվածքների հավաքածու ունեցող թանգարաններ և տեղի վերականգնողների և մասնագետների հետ քննարկել պահպանության վերաբերյալ մի շարք հարցեր: Ճապոնացի մասնագետը պարզել է, որ գործվածքի վերականգնման բնագավառի հայաստանյան մասնագետները կարիք ունեն տեղեկատվական և տեխ­նիկական օժանդակության:
Ս. թ. դեկտեմբերի 6-14-ը, Հայաստանի պատմության թանգարանում տեղի է ունե­ցել տեքստիլի պահպանմանը և վերականգնմանը նվիրված սեմինար, որի ընթացքում մասնակիցները ուսումնասիրել են հետևյալ թեմաները. գործվածքի մաքրում՝ սպիտակեցում, ֆերմենտ­ներ, ներկում սինթետիկ ներկերով, երեք հիմնական գույների խառնում, գույների համադ­րում, կարը որպես տեքստիլի պահպանման և վերականգնման մեթոդ: Սեմինարի մասնակիցները տեսական գիտելիքները փորձարկել են նաև գործնականում:

Ճապոնական հիմնադրամի ֆինանսավորմամբ մասնակիցներին տրամադրվել է նաև Միե Իշիիի հեղինակած ձեռնարկը՝ հայերեն, անգլերեն, ճապոներեն լեզուներով:

Սեմինարին մասնակցել են Հայաստանի պատմության, Սարդարապատի հուշահամալիր, Հայաստանի ազգագրության և ազգային ազատագրական պայքարի, Մայր Աթոռ Սբ.Էջմիածնի թանգարաններից և Մատենադարանից 10 մասնագետ:

Տեքստիլի պահպանմանը և վերականգնմանը նվիրված սույն նախագիծը նվիրված է Հայաստանի Հանրապետության և Ճապոնիայի միջև դիվանագիտական կապերի հաստատ­ման 20-ամյակին և իրականացվել է Ճապո­նիայի արտաքի գործերի նախարարության աջակցությամբ: