Հայ աստղերը՝ աշխարհի վերջի մասին

Մոտենում է դեկտեմբերի 21-ը: Արդյո՞ք դա իրականություն կդառնա: Այս հարցի շուրջ արդեն մեկ տարի է տարբեր կարծիքներ են հնչում: Իսկ ի՞նչ են մտածում հայ աստղերը: Հավատո՞ւմ են նրանք արդյոք հայտնությանը։

Սոֆի Մխեյան. Գիտեք, բացարձակապես ուղեղս չեմ ծանրաբեռնում նման բացասական բաներով: Ասեմ, որ դեկտեմբերի 20-ին իմ նոր՝ «2012» կոչվող ձայնասկավառակի շնորհանդեսն է: Օրը հատուկ է ընտված - 20. 12. 12: Այնպես որ, ես աշխարհի վերջը կդիմավորեմ ուրախ, ժպիտով ու նոր ձայնասկավառակով:

Ինչ վերաբերվում է դեկտեմբերի 21-ի իմ ծրագրերին, ասեմ, որ այդ օրն ինձ համար սովորական է լինելու՝ աշխատանքով, նկարահանումներով, հանդիպումներով լի... Համենայն դեպս, չեմ պատրաստվում մոմ ու լուցկի գնել, ինչպես նաեւ՝ սարսափով սպասել այդ օրվան:

Արսեն Սաֆարյան. Աշխարհի վերջին չեմ հավատում: Կարծում եմ, պետք է մտածել ոչ թե վերջի, այլ ապագայի մասին: Դեռ մանկուց մի քանի անգամ ականատես ենք եղել այդ վերջերին: Պետք չէ ամեն ինչին սնահավատորեն նայել, պետք է պարզապես ապրել ու չմտածել վատ բաների մասին: Իսկ դեկտեմբերի 21-ն ինձ համար սովորական օր է լինելու:

DJ Vakcina: Աշխարհի վերջի մասին բազմիցս է խոսվել: Դեռ իմ մանկության տարիներին բոլորիս վախեցնում էին աշխարհի վերջով: Բայց այդպես էլ չտեսանք այն: Աշխարհի վերջը երեւի վաղուց անցել-գնացել է, իսկ մենք անտեղյակ ենք:

Չգիտեի, որ մարդիկ 21-րդ դարում այդքան հետաքրքրված են մայաներից ժառանգություն հասած օրացույցով: Մի կողմից ուրախալի է, որ շատերը հետևում են դրան եւ նույնիսկ, ըստ դրա նախապատրաստվելով աշխարհ վերջին, հոգեպահուստ են հավաքում: Չնայած հայտնի էլ չէ՝ այդ պաշարը կօգտագործվի թե՞... Զավեշտալի է նույնիսկ, որ մի շարք բուքմեյքերական ընկերություններ խաղադրույքներ են սահմանում աշխարհի վերջի կապակցությամբ եւ «դարդ» անում, թե ո՞նց են ստանալու այդ գումարները, եթե աշխարհի վերջն իրոք վրա հասնի:

Դեկտեմբերի 21-ին անձամբ ես հումորով եմ վերաբերվում... Առավելագույնը, որ կարող եմ, շատ հետաքրքիր FRIDAY NIGHT կազմակերպելն է: Կարծում եմ, շատերի համար դա իրոք աշխարհի վերջը կլինի: Բայց վստահ եմ, որ շաբաթ օրն աշխարհի վերջի վերջն ավելի մեծ շուքով կշենք:

Գուրգեն Դաբաղյան. Բնականաբար, չեմ հավատում աշխարհի վերջին: Հիշում եմ, դեռեւս 1999-ին բոլորն իրար էին խառնվել ու սպասում էին 2000 - ի հայտնությանը։ Այդ ժամանակ ես ԱՄՆ-ում էի: Սակայն, ինչպես այդ տարի, այնպես էլ այսօր կարող եմ վստահ ասել. «Ես չեմ հավատում աշխարհի վերջին եւ վստահ եմ, որ նման բան չկա»: Դեկտեմբերի 21-ին ժպիտով եմ սպասում եւ զարմանում նրանց վրա, ովքեր հավատում են դրան:

Մերի Մակարյան. Չեմ հավատում աշխարհի վերջին, սակայն դեկտեմբերի 21-ին սպասելու եմ՝ տեսնելու համար, թե ի՞նչ է լինելու: Եթե մի բանի մասին այդքան խոսում են, հավանաբար անիմաստ չէ: Նորից եմ շեշտում. չեմ կարծում, որ աշխարհի վերջն անպայման լինելու է: Պաշարներ չեմ հավաքել, մոմ ու լուցկի չեմ գնել: Բայց նաեւ ոչինչ չեմ ծրագրել այդ օրը։ Սպասենք:

NEWS.am STYLE