Երևանում ձյան շերտի բարձրությունը 10-15սմ է

Այսօր ասուլիսի ժամանակ աշխարհի հավանական վերջին օրվա եղանակի մասին տեղեկություն հայտնեց «Հայպետհիդրոմետի» օդերևութաբանական կանխատեսումների բաժնի պետ Գագիկ Սուրենյանը: Դեկտեմբերի 21-ին հանրապետությունը գտնվելու է հզոր ցիկլոնի ազդեցության տակ: Հատկապես լեռնային շրջաններում առատ տեղումներ կլինեն:

«Վերջին հինգ օրերին հանրապետության տարածքը գտնվել է միջերկրական ծովից ներթափանցած ցիկլոնի ազդեցության գոտում, և պարբերաբար ձյուն է տեղացել: Վաղը երեկոյան ժամերից ցիկլոնը ուժ կհավաքի: Ձյան առատ տեղումներ են սպասվում հատկապես Շիրակում, Կոտայքում, Արագածոտնի և Վայոց Ձորի լեռնային շրջաններում: Նշված տեղերում օրվա ընթացքում հնարավոր է մինչև 20-25 սմ ձյան շերտի ավելացում»,- նշեց Գագիկ Սուրենյանը:

Ըստ մասնագետի լեռնային շրջաններին, հակառակ հանրապետության հովտային շրջաններում ցիկլոնը կբերի տաք հոսանքներ: Ջերմաստիճանի բարձրացումը կշարունակվի առաջիկա երկու օրերին ևս 2-4 աստիճանով:

Գագիկ Սուրենյան նշեց նաև, որ մայրաքաղաքում և Արարատյան դաշտում ջերմաստիճանը ցերեկային ժամերին կլինի 0-ից բարձր և արդյունքում՝ Երևանում, Արարատյան դաշտում, Սյունիքի հովիտներում և Տավուշի ցածրադիր շրջաններում տեղումները կլինեն անձրևի և թաց ձյան տեսքով: 

Իսկ Ամանորի գիշերը ձյուն կլինի, թե ոչ «Հայպետհիդրոմետի» օդերևութաբանական կանխատեսումների բաժնի պետը նշեց, որ դեռ վաղ է դրա մասին խոսելը: