Վանաձորի ինֆեկցիոն հիվանդանոց տեղափոխված 4 երեխաների մոտ ախտորոշվել է սալմոնելոզ

Վանաձորի ինֆեկցիոն հիվանդանոց տեղափոխված նույն ընտանիքի 4 անչափահաս երեխաների մոտ հաստատվել է սալմոնելոզ սուր աղիքային հիվանդությունը։ Հիվանդանոցից Panorama.am-ին փոխանցեցին, որ նրանց վիճակը լավ է, պատրաստվում են դուրս գրմանը։

«Չեմ կարող ասել, թե ինչից է, դա մեր խնդիրը չէ։ Խնջույք է եղել, կերել են ամեն ինչ՝ տորթ, երշիկ,  հաջորդ օրը ձվածեղ են կերել։ Կարող է իրենց տնական ձուն չեն լվանում, ձվածեղ են անում... Հնարավոր է։

Որևէ սննդի վրա հնարավոր չէ կենտրոնանալ։ Երևույթները երեխաների մոտ առաջացել են  խնջույքից 3 օր անց։ Խնջույքի մյուս մասնակիցների մոտ  առողջական որևէ խնդիր չի առաջացել, միայն նույն ընտանիքում»,- նշեցին հիվանդանոցից։  

Shamshyan.com-ը գրում է, որ մարտի 30-ին արտակարգ դեպք է տեղի ունեցել Լոռու մարզում։ Ժամը 22։50-ի սահմաններում ՀՀ ներքին գործերի նախարարության ոստիկանության համայնքային ոստիկանության գլխավոր վարչության Տարոնի բաժնում տեղեկություն է ստացվել, որ «աղիքային ինֆեկցիա» ախտորոշմամբ ծնողի կողմից «Վանաձոր» բժշկական կենտրոն են տեղափոխվել Լոռու մարզի բնակիչներ 7-ամյա Դ․ Գ․-ն, 12-ամյա Հ․ Գ․-ն, 14-ամյա Ա․ Գ․-ն և 10-ամյա Ա․ Գ․-ն՝ առողջական վիճակները՝ միջին ծանրության: