Ճիշտը սա էր. եթե սանձարձակ բաներ անեն, օրենքը շեղեն՝ ամբողջ ժողովուրդը ոտքի է կանգնելու. Վարդան Ղուկասյան

168.am-ը գրում է.

Քիչ առաջ «Մեր քաղաք»-ը դաշինքի քաղաքապետի թեկնածու Մարտուն Գրիգորյանը հայտարարություն է տարածել՝ տեղեկացնելով, որ կայացրել է որոշում, որն իր քաղաքական անցած ճանապարհի ամենաբարդագույն ու ծանր որոշումն է եղել, որի մասին շատ երկար է մտածել ու մեծ դժվարությամբ է եկել դրան։

«Քարոզարշավի ընթացքում ես բացահայտ ասել եմ և միակն եմ եղել, որ խոսել եմ՝ ինչ է լինելու ընտրություններից հետո, եթե քաղաքապետ ընտրվի Վարդան Ղուկասյանը։ Մնում եմ նույն համոզմունքին, որ նա ամենախոցելի թեկնածուն է՝ քրեական գործերով պայմանավորված։

Թե ի՞նչ կլինի հետո ու ինչպես կվարվեն տվյալ մարդու հետ՝ լավ հիշեք այս օրը։ Գյումրին կտանե՞ն Վանաձորի ճանապարհով, թե՞ ոչ՝ տա Աստված, որ սխալված լինեմ։

Եվ այսպես, «Մեր քաղաքը» դաշինքը հայտարարում է, որ կտա անհրաժեշտ քանակությամբ քվե՝ մյուս երկու ուժերի կողմից սատարվող թեկնածու Վարդան Ղուկասյանին՝ առանց որևէ պաշտոնի, ակնկալիքի և որևէ պայմանավորվածության»,- ասել է Մարտուն Գրիգորյանը։

168.am-ի հետ զրույցում Վարդան Ղուկասյանն ասաց, որ Մարտուն Գրիգորյանի որոշման մասին տեղեկացել է նրա հրապարակած ֆեյսբուքյան գրառումից։

Հարցին՝ իր համար սպասելի՞ էր Մարտուն Գրիգորյանի ընդունած այս որոշումը, Վարդան Ղուկասյանը պատասխանեց.

«Այո, ինչո՞ւ ոչ, սպասում էի, որովհետև ընդհանուր առմամբ ճիշտը սա էր։ Ով ճշմարտության հետևից գնում է, այսպես պետք է անի, ես լինեի, ես էլ կանեի։ Ամեն մարդ պետք է իր խոսքի տերը լինի, որ ՔՊ-ն Գյումրիում քաղաքապետ չի ունենալու. ես դրան սպասում էի, այդքան բան»։

Մեր հաջորդ հարցին, թե արդյոք մտավախություններ չունի՞, որ իշխանությունները կսկսեն իր դեմ ճնշումներ բանեցնել, որի արդյունքում կիրականացնեն Վանաձորի սցենարը, Վարդան Ղուկասյանը պատասխանեց.

«Մտավախություններ չունեմ, որովհետև ես նման բան չեմ արել։ Իսկ եթե սանձարձակ բաներ անեն, օրենքը շեղեն ու ինչ-որ վատ բան անեն, ապա ամբողջ ժողովուրդը ոտքի է կանգնելու, ու այն, ինչ այսօր տեղի է ունենում Թուրքիայում, Հայաստանում էլ կլինի։ Ես դա խոսք եմ տալիս։

Փառք տիրոջը, տրամադրությունս նույնն է, որովհետև գիտեմ, թե ինչ դժվար լծի տակ եմ մտնում, պատասխանատու։ Ինքս գիտեմ՝ ուր եմ գնում, աշխատել եմ, իմ ասած խոսքերի ծանրությունը գիտեմ»։

Մանրամասները՝ սկզբնաղբյուր կայքում