Պատերազմի սպառնալիքը բռնության նոր ալիքի, արնահեղության և ատելության հանգեցնող ամենաանհեռատես ճանապարհն է. Սերժ Սարգսյան

ՀՀ նախագահ Սերժ Սարգսյանը, ելույթ ունենենալով Մոսկվայում ՀԱՊԿ անդամ պետությունների ղեկավարների հանդիպման ժամանակ, նշել է, որ Ադրբեջանի մոտեցումը Լեռնային Ղարաբաղի հակամարտության հարցին ապակառուցողական բնույթ է կրում: Սերժ Սարգսյանը նաև մատնանշել է ձեռք բերված պայմանավորվածությունների բազմակի խախտումները Ադրբեջանի կողմից: Այս մասին հայտնում է Риа Новости գործակալությունը:

«Տարածաշրջանում շարունակում է լուրջ սպառնալիք է ներկայացնել Ադրբեջանի ապակառուցողական մոտեցումը ղարաբաղյան հակամարտությանը»,-ասել է նախագահ Սարգսյանը ՀԱՊԿ-ի հավաքական անվտանգության խորհրդի նիստի ժամանակ: «Նույնիսկ սահմանային գոտում միջադեպերը հետաքննելու հարցում արդեն ձեռք բերված պայմանավորվածությունները խախտվում են պաշտոնական Բաքվի կողմից»,-հավելել է նախագահը:

Նախագահը նաև նշել է, որ Ադրբեջանում տարվում է ակտիվ հակահայկական քաղաքականություն: Բաքուն շարունակում է հակամարտության ռազմականացումը:

Սարգսյանը նշել է, որ հակամարտության կարգավորման միակ ճանապարհը մնում են խաղաղ բանակցությունները: «Մենք ելնում ենք նրանից, որ ձեռք բերված և արդեն 18 տարի գործող զինադադարից հետո պատերազմական գործողությունների վերսկսումը, նույնիսկ դրանց վերսկսման սպառնալիքն արդեն միջազգային իրավունքի նորմերի և սկզբունքերի խախտում է: Դա բռնության նոր ալիքի, արնահեղության և ատելության հանգեցնող ամենաանհեռատես ճանապարհն է»,-նշել է ՀՀ նախագահը:

Սերժ Սարգսյանը նշել է, որ ՀԱՊԿ հիմնական սկզբունքներից մեկը կազմակերպության անդամ պետությունների ունեցած առավելությունն է անդամ չհանդիսացող երկրների նկատմամբ: Նա խնդրել է բոլոր անդամներին չմոռանալ այդ սկզբունքը և չաջակցել այն նախաձեռնություններին, որոնք կարող են վնաս հասցնել Հայաստանին: