Հասմիկ Կարապետյան. «Գումար աշխատելու համար եմ դիմել հեռուստահաղորդավարի կարիերային»

Հասմիկ Կարապետյանն անհամբեր սպասում է 2013 թվականին:

Երգչուհին BRAVO.am-ի հետ զրույցում պատմել է անցնող տարվա իր ձեռքբերումների, աշխատանքի եւ տոնածառ չզարդարելու պատճառների մասին:

Հասմիկ Կարապետյանն ու 2012 թվականը. Այս տարին ինձ համար լի էր դրական լիցքերով, աշխատանքային առումով էլ կան ձեռքբերումներ՝ երկու տեսահոլովակ, զուգերգ ԴերՀովայի հետ, որը «Դար 21»-ի մրցանակաբաշխությանը ճանաչվեց լավագույնը: 2012-ը բուռն էր հետաքրքիր իրադարձություններով, բացի այդ ունեցել եմ հոգեւոր ձեռքբերումներ՝ ինքնակրթմամբ եմ զբաղվել, սովորել եմ ապրել այսօրվա օրով եւ եթե ինչ-որ բանի վրա վստահ չեմ, չեմ բարձրաձայնում: Շնորհակալ եմ տարվա խորհրդանիշ վիշապին, որ կորուստների տարի չեղավ:

Հասմիկ Կարապետյանն ու 2012 թվականը. Այս տարին ինձ համար լի էր դրական լիցքերով, աշխատանքային առումով էլ կան ձեռքբերումներ՝ երկու տեսահոլովակ, զուգերգ ԴերՀովայի հետ, որը «Դար 21»-ի մրցանակաբաշխությանը ճանաչվեց լավագույնը: 2012-ը բուռն էր հետաքրքիր իրադարձություններով, բացի այդ ունեցել եմ հոգեւոր ձեռքբերումներ՝ ինքնակրթմամբ եմ զբաղվել, սովորել եմ ապրել այսօրվա օրով եւ եթե ինչ-որ բանի վրա վստահ չեմ, չեմ բարձրաձայնում: Շնորհակալ եմ տարվա խորհրդանիշ վիշապին, որ կորուստների տարի չեղավ:

Քանի որ 2013-ը օձի տարի է՝ իմ տարին, շատ մեծ սպասելիքներ ունեմ ու մեծ փոփոխություն եմ սպասում. չգիտեմ ինչու՝ ինձ թվում է՝ ամեն մարդու իր կենդանակերպի տարվա ընթացքում մի լավ անակնկալ է սպասվում: Թեեւ լիովին չեմ հավատում հորոսկոպներին, բայց ինձ դուր է գալիս, որ ամեն տարին իր խորհրդանիշ կենդանին ունի: Ես հավատքով ու սպասումով լի եմ գործնական ու անձնական փոփոխություններին:

Նոր տարին սիրում եմ, հոգուս հեքիաթը չեմ կորցրել, բայց տարիների ընթացքում տոնածառ զարդարելը, գունեղ խաղալիքներն ու աքսեսուարները մի քիչ անհետաքրքիր են դարձել: Մեր տանը տոնածառը զարդարում են քույրս ու մայրս: Երբ իմ ընտանիքն ու ստեղծած մթնոլորտն ունենամ, գուցե չեմ ալարի եւ մեծ հաճույքով կզարդարեմ:

Այս տարի նաեւ սկսեցի երգել ակումբում՝ շաբաթական երեք օր: Ուրախ եմ, որ կան մարդիկ, որոնք գալիս են լսելու Հասմիկ Կարապետյանի երգացանկի երգերը: Ըստ իս՝ երգիչը «ֆորմայի» մեջ լինելու համար պետք է երգի ժամանցի վայրերում: Իհարկե, տանն էլ երգում ու դաշնամուր եմ նվագում, բայց քեզ բեմն ու հանդիսատեսի ներկայությունը սթափ է պահում: Ակումբային աշխատանքիս մեծ պատասխանատվությամբ եմ մոտենում ու չեմ զլանում գեղեցիկ ներկայանալ, որովհետեւ հարգում եմ բեմը, կապ չունի մեծ համերգասրահում ես երգում, թե՝ ակումբում, պետք է կոկիկ ու բեմական լինես:

Գումարի խնդիր միշտ էլ կա, որքան մարդ աշխատի, միշտ թվում է՝ ավելին պետք է վաստակի, որովհետեւ կյանքի այս կամ այն բարիքներից դեռ չի կարողանում օգտվել: Ես փողն ինքնանպատակ չեմ դարձրել, բայց հնարավորության սահմաններում իմ երգելով եմ գումար աշխատել:

Ռեստորանային երգեր չեմ կատարում. հեղինակ-կատարող եմ, երգում եմ իմ հոգուց բխած երգերը… Ի ուրախություն ինձ՝ ունեմ իմ լսարանը, որն առ այսօր նվիրված է: Սակայն մեր երկրում, ցավոք, լսարանի մեծամասնությունը նախընտրում է պարային, մի քիչ ռաբիս ոճի եւ արաբական ռիթմերով լի երաժշտություն եւ, բնականաբար, ծնունդ-կնունք-հարսանիքներին Հասմիկ Կարապետյանի երգերը պահանջված չեն. չնայած եղել են հրավերքներ, երբ հարսը կամ փեսան եղել են իմ երկրպագուներից, նույնիսկ իմ երգերի անուններով պատվիրել են՝ որոնք են ուզում լսել:

Չեմ թաքցնի, որ գումար աշխատելու համար եմ դիմել հեռուստահաղորդավարի կարիերային: Նախ, ինձ համար հաճելի է եթերում մարդկանց հետ անմիջական շփումը, հետո էլ ունեմ համապատասխան փորձ եւ լավ գործընկերներ: