Գյումրին դառնալու է այս իշխանությունների վերջի սկիզբը, ՔՊ-ն կորցրել է հանրային վստահությունը․ Արմինե Օհանյան

«Գյումրին դառնալու է այս իշխանությունների վերջի սկիզբը, սրանով հող ստեղծվեց երկրով մեկ ՔՊ-ի պարտությունն ապահովելու եւ հեռացնելու համար»,- Ֆեյսբուքի իր էջում նման կարծիք է հայտնել «Հրապարակ»-ի գլխավոր խմբագիր Արմինե Օհանյանը։

 

 

«Գյումրու ընտրությունների հանգուցալուծմանը սպասող հանրությունը թեթեւացած շունչ քաշեց: Իհարկե, «ոմանք» հուսահատություն ապրեցին, որ գործող իշխանությունները պարտվեցին, բայց մեծամասնությունը, որն ակնկալում էր, որ Գյումրիում ընդդիմադիրները կմիանան եւ քաղաքը կվերցնեն ՔՊ-ից, մեծ ոգեւորություն է ապրում եւ հեռուն գնացող եզրակացություններ անում. Գյումրին դառնալու է այս իշխանությունների վերջի սկիզբը, սրանով հող ստեղծվեց երկրով մեկ ՔՊ-ի պարտությունն ապահովելու եւ հեռացնելու համար: Այսինքն, իշխանական լծակներն այլեւս չեն ապահովում սրանց հաղթանակը, քանի որ ՔՊ-ն` իր առաջնորդով, կորցրել է հանրային վստահությունը, լցրել մարդկանց համբերության բաժակը, վատնել իրեն տրված ժամանակը եւ ի չար պետության գործադրել ստացած մանդատը:

 

Իհարկե, իշխանությունը, եւ հատկապես` Նիկոլ Փաշինյանը, դեռ չեն հաշտվում պարտության գաղափարի եւ իշխանություն կորցնելու հեռանկարի հետ: «Հարսնացուն», ինչպես հայտնի ֆիլմում է ասվում` կկծի, կխփի... բայց դրանք իշխանական վայելքները կորցնողի հուսահատ շարժումներ են, որոնք հաջողությամբ չեն պսակվելու` սա պետք է արձանագրել: Եւ ամենակարեւորը` հիմա շատ բան է կախված ընդդիմության պահվածքից ու որոշումներից:

 

Գյումրիում ստացած քվեներն ու Մարտուն Գրիգորյանի հայտարարությունն ընդամենը նոր ճանապարհի սկիզբն են: Առաջին քայլն արվել է, մնում են հաջորդները: Նախ` թույլ չտալ, որ քրեական մեթոդներով կրկին ժողովրդից խլեն իր քվեն եւ չընտրված անձին քաղաքապետ նշանակեն, ընդդիմության հանդեպ էլ տեռոր կիրառեն: Երկրորդ` դադարեցնել ընդդիմության ներսում գզվռտոցն ու կենտրոնանալ համապետական հաղթանակի վրա:

 

Երրորդ` հուսախաբ չանել ընտրողին, որ Գյումրին հակառակ էֆեկտն ունենա` մարդկանց համոզի, որ նախկիններին չի կարելի իշխանություն վստահել, որովհետեւ նրանք այս 7 տարվա ընթացքում դասեր չեն քաղել, հետեւություններ չեն արել եւ չեն հասկացել, որ պաշտոնյաների հղփանալը մի օր հենց իրենց քթից է գալիս: Փաշինյանի եւ նրա թիմակիցների` Գյումրիում ձախողվելը նաեւ ցույց տվեց, որ ինտրիգներով, անօրինական, հակաժողովրդավարական մեթոդներով այլեւս հնարավոր չէ իշխել երկրում: Ինչպես ասում են` պապն ամեն անգամ գաթա չի ուտում... երբեմն էլ գաթան տատին է բաժին հասնում:

 

Վերջապես` երկիրն աղետի հասցրած եւ ներսում-դրսում ձախողված իշխանությունների հաղթարշավը մի տեղ պետք է կանգներ, եւ դրա առաջին կանգառը Գյումրին էր»: