2012-ի 9 ամսվա կտրվածքով մշակույթի նախարարության եկամուտը կազմել է 686 059.7 հազ. դրամ

Հայաստան 20 Դեկտեմբեր, 2012 11:48

Այսօր կառավարության նիստի ժամանակ ՀՀ մշակույթի նախարար Հասմիկ Պողոսյանը ներկայացրեց մշակույթի ոլորտի հարկային պարտավորությունների կատարման և տնտեսական աճի ներուժի մասին հաշվետվությունը:

Մշակույթի ոլորտում եկամուտները գոյանում են բնակչությանը մատուցվող մշակութային ծառայություններից (թատերական ներկայացումների, համերգների հանդիսատեսի ու ցուցահանդեսների այցելուների տոմսերի վաճառք, դահլիճների, տարածքների վարձակալություն, նկարների պահատվություն, մատենագիտական և ինդեքսավորման ծառայություններ) և այլ եկամուտներից (հովանավորչական գումարներ, դրամաշնորհային ծրագրեր, գրքերի, թերթերի, հուշանվերների և այլ մշակութային արտադրանքի վաճառք):

Մշակույթի ոլորտում տնտեսական աճի ներուժին ուղղված մշակութային ծառայությունները և դրա հետ կապված հարկային պարտավորությունների կատարումները դիտարկվել են 157 մշակութային կազմակերպություններում, 2012թ. 9 ամիսների կտրվածքով՝ 2011 թ. նույն ժամանակահատվածի համեմատությամբ, այդ թվում՝

. ՀՀ մշակույթի նախարարության ենթակայության ներքո գործող պետական ոչ առևտրային 74 կազմակերպություններում և փակ բաժնետիրական 4 ընկերություններում,

. մշակույթի ոլորտում գործող պետական ոչ առևտրային՝ 1, փակ և բաց բաժնետիրական՝ 14, սահմանափակ պատասխանատվությամբ' 64 ընկերություններում:

ՀՀ մշակույթի նախարարության ենթակայության պետական ոչ առևտրային կազմակերպությունների մշակութային ծառայություններից և այլ եկամուտներից գոյացող համախառն եկամուտները 2012 թ. ինն ամսվա կտրվածքով կազմել է 686 059.7 հազ. դրամ՝ 2011 թ. նույն ժամանակահատվածի 612 976.0 հազ. դրամի դիմաց՝ նույն ժամանակահատվածում աճել է 73 083.7 հազ. դրամով կամ 11.9 %-ով:

2012 թ. 4-րդ եռամսյակում կանխատեսվում է մշակութային ծառայություններից և այլ եկամուտներից հավաքագրել 288 003.4 հազ. դրամ համախառն եկամուտ:

2012 թ. համախառն եկամտի սպասվող կատարողականը կկազմի 1 024 726.0 հազ. դրամ՝ նախորդ տարվա փաստացի 879 213.7 հազ. դրամի համեմատ, կանխատեսվող աճը՝ 145 512.3 հազ. դրամ կամ 16.6 %:

Կազմակերպությունների աշխատողների միջին թվաքանակը 2012 թ. ինն ամսում կազմել է 5765 մարդ 2011 թ. նույն ժամանակահատվածի 5649-ի դիմաց: Աշխատողների միջին ամսական աշխատավարձը 2012 թ. ինն ամսում կազմել է 64579 դրամ 2011 թ. նույն ժամանակահատվածի 64525-ի դիմաց: