Ոստիկանությունը զբաղվում է ընտրողների ցուցակների ճշգրտմամբ

Դեկտեմբերի 19-ին Երևանի «Էրեբունի պլազա» հյուրանոցում տեղի է ունեցել Ոստիկանության աշխատակիցների և IFES ընտրական համակարգերի միջազգային հիմնադրամի Հայաստանյան գրասենյակի ներկայացուցիչների հանդիպումը, որի նպատակը Ոստիկանության կողմից բնակչության պետական ռեգիստրում մշակվող տեղեկությունների հավաստիությունն ու լրիվությունն ապահովելու ուղղությամբ տարվող աշխատանքներին օժանդակելն է:

Հանդիպմանը մասնակցել են ոստիկանության պետի տեղակալ, ոստիկանության գեներալ-մայոր Արթուր Օսիկյանը, ԱՎՎ պետ Հովհաննես Քոչարյանը, IFES ներկայացուցիչները, մի շարք ոստիկաններ և հասարակական կազմակերպությունների անդամներ:

Բացման խոսքով հանդես է եկել IFES ներկայացուցիչ Արմեն Մկրտչյանը:

Հանդիպման մասնակիցներին ողջունել է ոստիկանապետի տեղակալ Արթուր Օսիկյանը, ով կարևորելով գործընթացը, նշել է, որ աշխատանքը, որն այժմ արվում է իսկապես ողջունելի է, քանզի հետապնդում է մեկ կարևորագույն նպատակ, այն է' հասարակությանը հուզող գլխավոր հարցերից մեկի՝ ընտրողների ցուցակների ճշգրտումը:

Հանդիպման ընթացքում հատկապես կարևորվել է դռնեդուռ այցերի ծրագրի իրականացման շրջանակներում ուսուցանող-կամավորներին ոստիկանների կողմից մասնագիտական գիտելիքների և փորձի փոխանցման նշանակությունը' հետագայում ավելի լավ արդյունքների ապահովման հարցում:

Քննարկվել են նաև համատեղ գործողությունների ուղղությունները, միջոցառումների ժամանակացույցն ու կատարվող աշխատանքների ծավալը: