Մրցանակներ՝ ԱԺ աշխատակիցներին

Դեկտեմբերի 20-ին Ազգային ժողովում կայացավ ԵԱՀԿ երեւանյան գրասենյակի եւ ԵԱՀԿ-ի խորհրդարանական վեհաժողովի կողմից համատեղ հայտարարված հետազոտական աշխատությունների մրցույթի մրցանակաբաշխության հանդիսավոր արարողությունը: ՀՀ Ազգային ժողովի կարողությունների զարգացման օժանդակության ծրագրի շրջանակներում կազմակերպված մրցույթը, որին ԱԺ աշխատակիցների ներկայացրած հետազոտությունները նվիրված էին տարբեր ոլորտներում մի շարք հիմնախնդիրների լուծման քաղաքականության համեմատական վերլուծությանը, նպատակ ուներ խրախուսել եւ օժանդակել Ազգային ժողովում հետազոտական կարողությունների զարգացմանը, նպաստել իրավական կարգավորման տարաբնույթ հարցերի նկատմամբ միջազգայնորեն կիրառվող ժամանակակից սկզբունքների ու լավագույն մոդելների վերաբերյալ իրազեկության եւ ըմբռնման մակարդակի բարձրացմանը:

Ինչպես նշեց ԱԺ աշխատակազմի ղեկավար Գուրգեն Դումանյանը՝ հետազոտական այս մրցույթն ԱԺ-ի եւ ԵԱՀԿ երեւանյան գրասենյակի արդյունավետ համագործակցության լավագույն արդյունքներից է: Նրա խոսքով՝ մրցույթն ԱԺ աշխատակիցներին հնարավորություն է տվել զարգացնելու իրենց հետազոտական հմտությունները, որոնք հետագայում հնարավոր կլինի արդյունավետ կիրառել գործնական աշխատանքներում: Շնորհակալություն հայտնելով ԵԱՀԿ երեւանյան գրասենյակին նախաձեռնության եւ ԱԺ աշխատակիցներին՝ մասնակցության համար, Գուրգեն Դումանյանը վստահություն հայտնեց, որ նման արդյունավետ համագործակցությունը կկրի շարունակական բնույթ:

Շնորհավորելով մասնակիցներին՝ ԵԱՀԿ երեւանյան գրասենյակի ղեկավար Անդրեյ Սորոկինը գոհունակություն հայտնեց, որ ավանդական դարձած այս մրցույթը հնարավորություն է տալիս խրախուսել եւ զարգացնել մտավոր աշխատանքն ու գործին ստեղծագործական մոտեցումը: Նրա խոսքով՝ սա հենց այն ռեսուրսն է, որով հատկապես հարուստ է Հայաստանը:

Մրցույթի մասնակիցների ներկայացրած աշխատանքներն անանուն ուղարկվել էին Կոպենհագեն, որտեղ գտնվում է ԵԱՀԿ ԽՎ քարտուղարությունը, վերջինիս աշխատակիցներն էլ որոշել են լավագույն հետազոտությունները: Անդրեյ Սորոկինը բարձր գնահատեց ներկայացված բոլոր աշխատանքներն էլ՝ նշելով, որ դրանք աչքի են ընկել իրենց վերլուծական բաղադրիչով, հարուստ, օգտակար տեղեկություններով: Նա մրցույթում հաղթած եւ աչքի ընկած աշխատանքների հեղինակներին շնորհեց դրամական պարգեւներ ու նվերներ: Առաջին մրցանակին արժանացավ Ազգային ժողովի աշխատակազմի ներքին աուդիտի բաժնի վարիչ Արամ Շաքարյանի եւ նույն բաժնի գլխավոր մասնագետ Արմեն Սիմոնյանի հեղինակած «Տեղեկատվական տեխնոլոգիաների ներդրումը խորհրդարանի աշխատանքների արդյունավետության բարձրացման նպատակով» վերլուծությունը: Նրանց շնորհվեց նաեւ «Լավագույն թիմային աշխատանք» մրցանակը՝ «Համեմատական վերլուծություն. փոքր եւ միջին ձեռներեցության խթանմանն ուղղված օրենսդրական բարեփոխումների հաջողված օրինակներ (առանձին ոլորտներում եւ համապարփակ)» աշխատանքի համար:

Շնորհավորելով հաղթողներին՝ ԱԺ աշխատակազմի ղեկավար Գուրգեն Դումանյանը հույս հայտնեց, որ գալիք տարի մրցույթին մասնակցությունը կլինի ավելի ակտիվ եւ արդյունավետ: