Թե ինչպես գեներալ Մանվելը փրկեց ՀՀԿ-ին

Այն, ինչ կատարվեց երեկ խորհրդարանում, երևի թե անհավանականների շարքից էր: Մի պահ ՀՀԿ-ն հայտնվեց իրապես օրհասական վիճակում: Երեք օր շարունակ բոցաշունչ քննարկումների քուրայով անցած Էթիկայի հանձնաժողովին վերաբերող օրինագծի ընդունման ժամանակ ՀՀԿ-ն փաստի առաջ հայտնվեց: Իբրև թե ընդդիմության ու «այլընտրանքի» հետ ինչ-ինչ պայմանավորվածություններ էին ձեռք բերված: Վերջին պահին, սակայն, մեր ընդդիմադիրներն ու «այլընտրանքավորները», իրենց սովորության համաձայն, մտքափոխվեցին՝ հենց տեսան, որ օրն արդեն կեսօր է, իսկ այդ ժամին որոշ «գոլդ» պատգամավորներ անհայտ ուղղությամբ անհետանալու սովորություն ունեն և որոշեցին խաղ խաղալ հանրապետականների գլխին:

ԲՀԿ-ն, ՀՅԴ-ն, ՀԱԿ-ն ու «Ժառանգություն»-ը հայտարարեցին, որ չեն մասնակցելու քվեարկությանը: ՀՀԿ-ն սա հաշվի չէր առել. չմասնակցելու դեպքում արդեն ՀՀԿ-ի ձայները չէին բավարարում օրինագծի ընդունման ժամանակ. այստեղ անգամ աներձագն էր անօգուտ:

Գալուստ Սահակյանն անմիջապես կողմնորոշվեց և 20 րոպե ընդմիջում խնդրեց: Հաշվիչը միացավ ու սկսվեց պատգամավորների «բերման գործընթացը»: Առաջինն ԱԺ հասավ Սամվել Ալեքսանյանը: Վերարկուն հագին հենց լսեց «ՀՀԿ-ի փրկիչը ժամանեց՝ կե՛ցցե Սամվել Ալեքսանյանը» ռեպլիկս, շնչակտուր վրա բերեց «ես տեղ էլ չէի գնացել, ստեղ էի՝ չայ էի խմում կողքը»: «Պալտոյով չայ խմող» Ալեքսանյանը հազիվ հասցրեց մտնել ՀՀԿ խմբակցության սենյակ, հանել վերարկուն և ուղղվել դահլիճ: Եղած պատգամավորները զբաղեցրին տեղերը, սկսեցին չորս կողմը նայել, հաշվել, թե քանի հոգի դեռ չի բավարարում, երբ Հովիկ Աբրահամյանն այս անգամ ճիշտ կողմնորոշվեց ու՝ «արդեն ընդմիջման ժամ է, ընդմիջում 30 րոպե». ժամը 16.00 -16.30 ԱԺ-ում ընդմիջում է՝ այս անգամ ՀՀԿ-ի «սրբազան» ընդմիջումը:

Ընդմիջումից հետո դահլիճում արդեն հրաշքներ կատարվեցին: Անկողնային հիվանդ «հալին» խորհրդարան էր եկել և մի կերպ վերարկուն հագին աթոռին տեղավորվել ոչ միայն Արկադի Համբարձումյանը (Դերժավայի Արկադի), այլև, պարզվեց, հնարավոր էր եղել այդքան կարճ ժամանակահատվածում անգամ գեներալ Մանվելին Էջմիածնից «հասցնել» Երևան: Միայն տեսնել էր հարկավոր, թե ինչպես էին վազում պատգամավորներն ու շտապում զբաղեցնել տեղերը, իրար հետևից կանոնավոր ինչպիսի վազքով նիստերի դահլիճ մտան ՀՀԿ-ական կանայք: Բացականեր դեռ կային, իհարկե (Կարեն Կարապետյանն առավոտյան կար, բայց մի կես ժամից դուրս եկավ՝ ինչ-որ հանդիպման էր գնում, որից, փաստորեն, չկարողացավ գալ, չկային Դավիթ Հարությունյանը, Սամվել Ֆարմանյանը, Մարինե Մարաբյանը, էլի մի երկու աթոռ դատարկ էին), սակայն վտանգն արդեն հետևում էր, քանակը՝ ապահովված:

Ի վերջո օրինագծին կողմ քվեարկեց 70 հոգի: Օրինագիծն ընդունվեց, իսկ ՀՀԿ-ականներն ընկան էքստազի մեջ, շողում էին ու հրճվում մի այլ կարգի՝ «տեսա՞ք ինչ արեցինք, պայմանավորվածությունները չեք պահո՞ւմ, դե, կտենա՛ք՝ ինչ կանենք…»:

Լուսինե Կեսոյան