Մանուկների և պատանիների գեղարվեստական կրթության և գեղագիտական դաստիարակության ծրագիր

Հայաստանի Հանրապետության կառավարության 2012 թվականի օգոստոսի 9-ի «Հայաստանի Հանրապետության կառավարության 2012 թվականի գործունեության միջոցառումների ծրագիրը և գերակա խնդիրները հաստատելու մասին» N 1055-Ն որոշման N 1 հավելվածի 68-րդ կետի համաձայն' ՀՀ կառավարության 2012 թ. նոյեմբերի 15-ի նիստում հավանության է արժանացել մանուկների և պատանիների գեղարվեստական կրթության և գեղագիտական դաստիարակության 2013-2015 թվականների ծրագիրը և միջոցառումները:
Ծրագրով սահմանվում են գեղարվեստական կրթության և գեղագիտական դաստիարակության տեղը պետական մշակութային քաղաքականության մեջ, որոշում է գեղարվեստական կրթության համակարգի ռազմավարությունը, զարգացման ուղղությունները, մատնանշում՝ նպատակներն ու խնդիրները, գեղարվեստական կրթության բովանդակությունը և հիմնական մեթոդաբանական սկզբունքները, ինչպես նաև, կարևորում ՀՀ ապագա քաղաքացիների ձևավորմանը նպաստող գեղագիտական դաստիարակության ծրագրերի իրականացումը:
Ծրագրում նախատեսված միջոցառումները ուղղված են մանկապատանեկան կրթամշակութային և գեղագիտական դաստիարակության բնագավառում պետական միասնական քաղաքականության իրականացմամբ զարգացման հիմքերի ապահովմանը, գեղարվեստական կրթության և գեղագիտական դաստիարակության համակարգերի ժամանակակից չափանիշներին համապատասխանեցմանը, նյութատեխնիկական բազայի բարելավմանը և արդիականացմանը, մշակույթի բնագավառի կադրային պահանջարկի համալրման պայմանների ստեղծմանը:
«Հայ գրատպության 500-ամյակի» և «Երևանը 2012 թ. գրքի համաշխարհային մայրաքաղաք» ծրագրի շրջանակներում ևս կարևորվել է մանուկների և պատանիների գեղարվեստական կրթության և գեղագիտական դաստիարակությանը միտված միջոցառումները: Մանկապատանեկան այս միջոցառումները մեկնարկել են 2011 թ. և կունենան իրենց արժանի շարունակությունը:

Այս համատեքստում, ՀՀ մշակույթի նախարարությունը՝ Խնկո Ապոր անվան ազգային մանկական գրադարանի և «Զանգակ» հրատարակչության հետ իրականացնում է «Ես գիրք եմ ստեղծում» մանկական գրական, ուսուցողական միջոցառումը, որի նպատակն է երեխաների ու պատանիների շրջանում գրքի և ընթերցանության հետաքրքրության մեծացումը՝ գրքի ստեղծման աշխատանքներին մասնակից դարձնելու միջոցով: Որպես ծրագրի առաջին փուլ՝ դեռևս տարվա սկզբին իրականացվել է «Գիրքը, որը փոխեց իմ կյանքը» խորագրով շարադրությունների մրցույթը, որի լավագույն աշխատանքները լույս կտեսնեն մեկ գրքով: Ծրագրի երկրորդ փուլում գիրքը պատկերազարդ դարձնելու նպատակով հայտարարվել է նկարազարդման մրցույթ: «Ես գիրք եմ ստեղծում» ծրագրի նկարազարդման փուլի մրցույթին մասնակցել են ՀՀ-ում գործող գեղարվեստի դպրոցների սաները, ինչպես նաև նկարելու շնորհ ունեցող 12-16 տարեկան յուրաքանչյուր պատանի, ովքեր հետագայում նաև կմասնակցեն գրքի ձևավորման աշխատանքներին:

ՀՀ մշակույթի նախարարության աջակցությամբ՝ «Այբուբեն» կրթահամալիրն իրականացնում է «Վերադարձնենք գիրքը երեխաներին» ծրագիրը, որը ներառում է տարբեր մրցութային ծրագրեր՝ նվիրված գրքին:

Ծրագրի նպատակն է դպրոցահասակ երեխաներին մղել ինքնակրթության, ինքնադաստիարակության, ինքնակատարելագործման, նրանց հաղորդակից դարձնել հայերենով ստեղծված գրական-գեղարվեստական ստեղծագործություններին, ազգային մշակույթին:
«Վերադարձնենք գիրքը երեխաներին» ծրագրի շրջանակում ՀՀ հանրակրթական 4 ուսումնական հաստատությունների 8-րդ դասարանցիների միջև կանցկացվի «Հայ գրատպություն» մրցույթը, որը բաղկացած է 5 փուլից և կամփոփվի ս. թ. դեկտեմբերի 24-ին, ժամը 17:00-ին Ա. Չեխովի անվան դպրոցում:

Ս. թ. դեկտեմբերի 21-ին, ժամը 11:00-ին ՀՀ մշակույթի նախարարությունում կայացած մամուլի ասուլիսին մասնակցում է ՀՀ մշակույթի նախարարի տեղակալ Արթուր Պողոսյանը: