Տարվա ամենահաճախակի այցելվող թանգարան է ճանաչվել Լուվրը

Եվրոպայի ամենակարևոր թանգարաններից մեկը՝ փարիզյան Լուվրը, անցնող 2012թ.-ի ամենահաճախակի այցելվող թանգարանն է ճանաչվել աշխարհում: Տարվա սկզբից այն վաճառել է 10 մլն տոմս: Այս թիվը գրեթե մեկ միլիոնով գերազանցում է նախորդ տարվա այցելությունների քանակը: Լուվրի այցելուների մեջ աշխարհի ամենատարբեր ծայրերից ժամանած մարդիկ են, գրում է France-24-ը:

Անցյալ տարին Լուվրի համար նշանավորվել է նոր՝ իսլամական արվեստի տաղավարի բացումով: Տաղավարի տարածքը զբաղեցնում է 3 հազար քառակուսի մետր, որի վրա ցուցադրված է մուսուլմանական երկրներից Լուվր բերված մի քանի հազար մշակույթի նմուշ: Միայն այս ցուցահանդեսին տարվա ընթացքում այցելել է 650 հազար մարդ:

Լուվրի հանրահայտ տաղավարներից են եղել նաև վերջերս ռեստավրացված՝ Լեոնարդո դա Վինչիի Սուրբ Աննա նմուշի և Ռաֆայելի ուշ շրջանի աշխատանքներին նվիրված սրահները: Առաջինն ունեցել է 305 հազար, իսկ երկրորդը՝ 310 հազար այցելու:

Հետաքրքրական է, որ Լուվրի այցելուները հիմնականում ոչ թե ֆրանսիացիներն են, այլ Բրազիլիայի և ԱՄՆ-ի քաղաքացիները: Երրորդ տեղում են չինացիները: Թանգարանի ղեկավարությունը ուրախությամբ նշում է, որ այցելուների կեսից ավելին այդ տարի եղել են 30 տարեկանից ցածր քաղաքացիներ: