Որքան են վաստակում հայ աստղերը Ամանորին

Տարվա կարևորագույն տոնին՝ Ամանորին, շատ քիչ ժամանակ է մնացել: Ռուս հայտնիներն արդեն սկսել են կազմել իրենց ելույթների ցուցակները: Մեր հայտնիներն էլ Ամանորի գիշերը աշխատելու առումով չեն զիջում արտասահմանյան աստղերին: Իսկ ահա հոնորարների հարցում, ինչ խոսք, զիջում են: Թերևս հենց դա է պատճառը, որ esyes.am-ի հետ զրույցում որոշ հայտնիներ հրաժարվեցին հստակ գումար նշել՝ պատճառաբանելով, որ եթե խոսքը մեծ գումարների մասին լիներ, անպայման կասեին:

Այս տարի Ամանորի գիշերը երգչուհի Սիլվա Հակոբյանը երգելու է մի քանի ռեստորաններում, այդ թվում նաև՝ քաղաքից դուրս գտնվողներից մեկում: Սիլվան նշեց, որ հաճելի կլիներ այդ օրը տանը մնալ, սակայն որպես երգչուհի պետք է նաև աշխատի: Esyes.am-ի հետ զրույցում երգչուհու հայրն ու պրոդյուսերը՝ Հակոբ Հակոբյանը, նշեց միայն արտերկրում տրվող համերգային ծրագի հոնորարը, որը հասնում է մինչև 25.000 ԱՄՆ դոլարի:

Երգչուհի Նարինե Մկրտումյանը, ով ժամանկին երգում էր «4 տարբերակ» խմբում, Ամանորի գիշերը գործընկերների հետ երգելու է Դիլիջանում գտնվող ռեստորաններից մեկում: Երգչուհին մի քանի ժամով է լինելու նշված վայրում, ինչի համար վճարվելու է մոտ 2500 ԱՄՆ դոլար:

Մի քանի տարի շարունակ Ամանորի գիշերը տանը չանցկացնող Նարեկ Բավեյանը մեկ երգը կատարում է 1500 դոլարով:

Շատ աղջիկների սիրելի, սերիալային դերասան, երգիչ Միհրան Ծառուկյանը նախորդ տարիներին Ամանորի գիշերն աշխատել է երևանյան ժամանցի կենտրոններում: Նրա պրոդյուսեր Ալեքսանդր Ստեփանյանը esyes.am-ին հայտնեց, որ այս տարի երգչի հորորարները փոխվել են` կապված Միհրանի ռեյթինգի բարձրանալու հետ:

Երգիչ Արամեն 2013-ը դիմավորելու է իր նորաբաց կարաոկե-ակումբում, իսկ թե ինչքան է «վարձատրվելու», հայտնի չէ:) Երգչի պրոդյուսեր Արտյոմ Հակոբյանը նշեց, որ Արամեն նախորդ տարիներին աշխատել է Ամանորի գիշերը, սակայն հոնորարների մասին գերադասեց լռել:

Երգչուհի Լիլիթ Հովհաննիսյանը նույնպես աշխատելու է Ամանորի գիշերը` երևանյան ռեստորաններից մեկում. հոնորարների և այլ մանրամասների մասին Լիլիթի պրոդյուսեր և ամուսին Վահրամ Պետրոսյանը չցանկացավ բարձրաձայնել:

Սյուզի Մելիքյանը Նոր տարին ծնողների հետ դիմավորելու է Ծաղկաձորում, որտեղ ռեստորաններից մեկում էլ երգելու է` նշելով գալիք տարին: «Կարևորը` երգով սկսեմ Նոր տարին, իսկ հոնորարներն այնքան էլ մեծ չեն»,-esyes.am-ին ասաց Սյուզին:

Երգչուհի Արմինե Գրիգորյանը Ամանորի գիշերը լինելու է իր մշտական աշխատավայրում, ինչի պատճառով էլ հստակ հոնորար չունի, թեև, ըստ նրա, այդ օրը հաստատ հավելավճար կստանա:

Ամանորի գիշերը երգչուհի Հասմիկ Կարապետյանը երգելու է երևանյան ժամանցի կենտրոններից մեկում, որտեղ նա մշտական աշխատանք ունի: Բացի դրանից, նա Ծաղկաձորում երգելու հրավեր էլ ունի: Երգչուհու խոսքերով` անցած տարիների համեմատ իր հոնորարներում ոչինչ չի փոխվել. «Ամեն մարդ ունի իր գնացուցակը. դա իմ և այն մարդկանց գործն է, որոնց հետ պայմանավորվել եմ և, բնականաբար, չեմ նշի հստակ գումարի չափը»: