Նորքի սրտաբանականը հաղթել է ՊՎԾ-ին

Hraparak.am-ը գրել է.

Մի ուրախ պատմություն է վերջերս տեղի ունեցել վարչական դատարանում:  «Նորք Մարաշ» բժշկական կենտրոնը շահել է դատն` ընդդեմ Պետական վերահսկողական ծառայության, ընդդեմ Ռոմանոս Պետրոսյանի: Հիշեցնենք՝ այս ԲԿ-ն վաղուց է իրավապահների թիրախում հայտնվել: Մի 2 տարի առաջ քրեական գործ հարուցեցին, հետո ՊՎԾ–ն ստուգումներ իրականացրեց եւ ուղարկեց արդյունքները դատախազություն: Ըստ  տարածած հաղորդագրության, «Նորք-Մարաշ բժշկական կենտրոն» ՓԲ ընկերությունում արձանագրվել են ընդհանուր 97.835.100,0 ՀՀ դրամի խախտումներ: «Մենք գտնում ենք, որ խախտումները տասնյակ անգամ ավելի քիչ են եւ զուտ ընթացակարգային են, ինչի հետ կապված մենք տվել ենք պարզաբանումներ եւ առարկություններ, եւ եթե այս գումարը չվերանայվի, ապա կդիմենք համապատասխան մարմիններին՝ մեր իրավունքները պաշտպանելու նպատակով», – հայտարարել էր Միքայել Ադամյանը եւ դիմեց ու հաղթեց: 

ԲԿ-ն պահանջել էր ճանաչել «ենթադրյալ խախտման» բացակայությունը: Դատարանն էլ բավարարել է «Նորք-Մարաշ» ԲԿ-ի պահանջը, սահմանելով, որ խախտումների մասին ՊՎԾ-ի ներկայացրած տեղեկանքն ու ամփոփագիրը «չի համապատասխանում վարչական ակտի հիմնավորվածության ու որոշակիության հատկանիշին», չկա համապատասխան հաշվարկ, որից հստակ լիներ, թե ինչի արդյունքում է ստացվել խախտման 97 մլն դրամը: ՊՎԾ-ն համառում է` դիմել է վերաքննիչ վարչական դատարան: