Ինչպես նորաձև դիմավորել Օձի տարին. խորհուրդներ լեդիներին ոճաբանից

Սպասվող տոներին անկրկնելի արտաքին տեսք ապահովելն արդեն անցնում է նորաձեւ լեդիների հաճելի մտահոգությունների շարքը: Դե ինչ, LadyNews-ը կօգնի ձեզ կողմնորոշվել՝ խորհրդակցելով լավագույն ոճաբաններից մեկի՝ «Ատեքս» նորաձեւության կենտրոնի տնօրեն Կարինե Դնոյանի հետ:

Տիկին Դնոյան, ինչ կանխատեսումներ կան նորաձեւության աշխարհում՝ Օձի տարին դեռ չսկսված: Խանութներում արդեն որոշ տենդնեցներ աչքի են ընկնում՝ կիպ հագուստներ, օձի պրինտ…

Վիշապի տարում շատ նորաձեւ էին տարբեր դաջվածքներով կաշիները, եկող՝ Օձի տարում պետք է որ նույն տրամաբանությունն աշխատի նորաձեւությունում կաշիների հարցում, բայց կարող է լինել նաեւ ճիշտ հակառակը: Այսինքն՝ հաստատ կգտնվեն մարդիկ, որ կհրաժարվեն կաշիներից՝ մեկնաբանելով, որ դա օձին դուր չի գա…Այնպես որ նորաձեւության մեջ կարող է դեր խաղալ անգամ սնահավատությունը:
Մարմնի պլաստիկան այս տարի անպայման կգնահատվի. նորաձեւ կլինեն ընդգրկող շորիկները: Ամենակարեւորը՝ կառուցվածքին համապատասխան շորիկ լինի: Եթե խոսքը երեկոյան զգեստների մասին է, ապա թրենդային են փայլերը, թավիշը, որոնք, սակայն, տեսողականորեն գիրացնում են: Լուծումը ճիշտ ձեւվածք ընտրելն է: Ես՝ որպես ոճաբան, Ամանորին խորհուրդ կտամ կրել նորաձեւություն վերադարձող թավիշը՝ իր հարուստ գույներով՝ մուգ կանաչ, կարմիր, կապույտ: Թավշից կիպ շորիկներ:

Ինչպես երեւում է, դիետաներն էլ են խիստ նորաձեւ դառնում այս սեզոն…

Դիետաները, իհարկե, միշտ նորաձեւ են, եւ գեղեցիկ մարմին ունենալը յուրաքանչյուր կնոջ երազանքն է, իսկ այս տարի այդ գեղեցկությունը պետք է նաեւ ընդգծել: Շարունակելով թրենդներից խոսել՝ ասեմ, որ ակտուալ է դառնում նաեւ փայլուն դեկորը: Նորաձեւության լեզվում դա բարոկկո ոճն է: Ի դեպ, կարելի է միացնել մի քանի տենդենց, օրինակ՝ թավիշն ու փայլուն դեկորը: Հատկապես երիտասարդներին խորհուրդ կտամ օգտագործել թեփուկանման փայլեր, որոնք եւս կխորհրդանշեն Օձի տարին: Նման թեփուկներով կտորը հեռվից թողնում է օձի կաշվի տպավորություն:

Շատ ակտուալ է մորթին՝ հատկապես փոքր դետալներում եւ ներկված՝ օձիքի տեսքով, թեւնոց կամ որպես թիկնոց: Բայց դարձյալ սնահավատներն այս հարցում կտատանվեն. չէ որ օձերը շատ են սիրում փոքրիկ փամփլիկների … Չի բացառվում՝ նա մորթի տեսնելիս կուլ տա, ինչպես նապաստակի կամ մկնիկի :)

Նորաձեւ է մազերը գլխաշորով կամ աբադոկներով հավաքելը: Եթե դա Ձեր նախասիրած տարբերակը չէ, ամեն դեպքում իմացեք՝ Օձի տարում նախընտրելի են լինելու հավաքած մազերը, սակայն այնպիսի սանրվածքները, որոնք կպարունակեն ալիքի մաս…Կամ, ասենք, եթե կարճ կտրվածք է, ապա՝ ալիքաձեւ առաջամասով: Հատկապես ամռանը շատ ակտուալ կլինեն հյուսերը: Դրանք մոդայիկ են նաեւ երեկոյան սանրվածքներում, բայց շատ խիստ ոճի մեջ՝ հատիկ-հատիկ հավաքած մազերով. օձը սիրում է կարգուկանոն, կազմակերպվածություն: Սա խուճուճիկ մազերի տարի է. ամեն ալիքաձեւ բան սիրված է տարվա խորհրդանիշի կողմից:

Իսկ զարդե՞րը:

Նոր տավա տոնական գիշերը խորհուրդ չէի տա կրել բիժուտերիա. թող փոքրիկ զարդ լինի, բայց թանկարժեք: Օձը սիրում է թանկարժեք քարեր, ազնիվ մետաղներ: Բացի այդ, բիժուտերիան համադրել թանկ կտորների հետ այնքան էլ ճիշտ չէ, իսկ այս տարի նորաձեւ է հենց թանկարժեք կտորեղենը: Ինձ արդեն հանդիպում են նաեւ օձաձեւ զարդեր, որոնք, կարծում եմ, ողջ տարին մեծ պահանջարկ կունենան:

Կոշիկներն ու պայուսա՞կը:

Օձի կաշվի սիրահարների եւ, իհարկե, այդ հնարավորությունն ունեցողների համար, մեծ պահանջարկ կվայելեն օձի կաշվից կոշիկներն ու պայուսակները: Փոքրիկ, փայլուն կլատչերի սիրահարները կարող են ուրախանալ. դրանք հատկապես հիմա երեկոյան հագուկապի զարդն են ուղղակի: Պարտադիր չէ' կոշիկներն ու կլատչը համադրել գույնով, բայց ուշադրություն դարձրեք, որ դրանք երկուսն էլ նույն կամ մոտ կտորներից լինեն:

Համոզված եմ՝ շատերը շուտով կսկսեն կրել օձի պրինտ: Բայց ինչպես կենդանական ցանկացած պրինտի դեպքում, դժվար է համադրել, քիչ չեն հանդիպում չհաջողված օրինակներ… Ինչ խորհուրդ կտաք:

Այո, իսկապես կարելի է հասնել անգամ գռեհկության: Կանայք կենդանական պրինտ կրելիս պետք է անպայման հաշվի առնեն, որ դա ագրեսիվություն է հաղորդում կերպարին: Ինչ վերաբերում է համադրությանը, ապա պետք է խուսափել չարաշահումներից: Հիմնականում նման պրինտ կրելու դեպքում ավելորդ են դառնում զարդերը: Եթե սիրում եք հովազի կամ օձի պրինտ, գերադասելի է՝ այդպիսին լինի միայն կոշիկը կամ պայուսակը, գոտին:

Շատ կանանց կհետաքրքրի տան ամանորյա հարդարանքը: Որպես ոճաբան, ինչ խորհուրդ կտաք Օձի տարվա համար:

Ստանդարտ, ավանդական մոտեցումներն ընդունելի են, բայց ինչպես ավանդապահ օձն է անսպասելի կաշին փոխում, այնպես էլ ինչ-որ յուրահատուկ դեկոր կարելի է ներմուծել… Ցանկալի է սեփական ձեռքերով գեղեցիկ անկյուն պատրաստել. նորովի մոտեցումը հոգեբանորեն ձեզ կտրամադրի նոր հեռանկարների: