«Արտակարգ» քաղաքում կհիմնվի ԱԻ թանգարան

Այսօր ՀՀ ԱԻ նախարարությունում տեղի է ունեցել հերթական ամենշաբաթյա խորհրդակցությունը, որը վարել է նախարար Արմեն Երիցյանը։

Խորհրդակցության ընթացքում քննարկվել են ՀՀ ԱԻ նախարարության նոր, 9-հարկանի մասնաշենքի կահավորման, տեխնիկական հագեցվածության և աշխատակիցների տեղափոխման հարցերը։

Անցած շաբաթվա ընթացքում ԱԻՆ մասնաշենքերում ավարտվել են հաշմանդամություն ունեցող անձանց համար անհրաժեշտ պայմանների հետ կապված վերանորոգման աշխատանքները, կառուցվել են նոր թեքահարթակներ' շենքերի բոլոր հատվածներում նրանց հարմար տեղաշարժն ապահովելու համար։ Պայմանավորվածությունների համաձայն' կտրամադրվի հատուկ միկրոավտոբուս, որն ԱԻՆ համակարգում աշխատանքի ընդունված հաշմանդամներին կտեղափոխի աշխատավայր։ Մրցույթի առաջին փուլով նախնական հարցազրույցն անցած հաշմանդամների համար շուտով կսկսվի վերապատրաստման գործընթացը։

ԱԻ նախարար Ա. Երիցյանի նախաձեռնությամբ' նախարարության մասնաշենքերից մեկում կստեղծվի Արտակարգ իրավիճակների թանգարան, որտեղ ներկայացված կլինեն ԱԻՆ կազմում ընդգրկված բոլոր ծառայությունների պատմությունը, անցած ուղին, արխիվային նյութերը, հին տեխնիկական միջոցները և այլն։