Բացվել է պրոֆեսոր Հրանտ Հակոբյանի կիսանդրին

Փիլիսոփայական գիտությունների դոկտոր, պրոֆեսոր, ՀՀ վաստակավոր մանկավարժ, Գավառի պատվավոր քաղաքացի Հրանտ Խաչատուրի Հակոբյանի ծննդյան 85-ամյակի կապակցությամբ Գավառի պետական համալսարանում տեղի է ունեցել հիմնադիր ռեկտորի կիսանդրու բացման հանդիսավոր արարողությունը: Միջոցառմանը մասնակցել են ՀՀ կրթության և գիտության նախարար Արմեն Աշոտյանը, ՀՀ Սփյուռքի նախարար, ԳՊՀ խորհրդի նախագահ Հրանուշ Հակոբյանը, ՀՀ Գեղարքունիքի մարզպետ Ռաֆիկ Գրիգորյանը, Ազգային ժողովի պատգամավորներ, ռեկտորներ ու կրթամշակութային ոլորտի ներկայացուցիչներ:

ՀՀ կրթության և գիտության նախարար Արմեն Աշոտյանն իր խոսքում նշել է. «Նա իսկական մարդ էր, արհեստականություն չկար նրա մեջ, իր հայրենասիրական պոռթկումները, կյանքի նկատմամբ իր լավատեսությունը, սերը դեպի կրթությունը, նվիրվածությունն իր հողին ու ջրին իրական են և ամեն օր, ամեն ժամ, ամեն րոպե ապացուցված իրողություններ»:
Գեղարքունյաց թեմի առաջնորդ Տեր Մարկոս եպիսկոպոս Հովհաննիսյանը կատարել է կիսանդրու բացման արարողությունը:
ԳՊՀ ռեկտոր Ռուզաննա Հակոբյանը նշել է. «Գավառի պետական համալսարանի կենտրոնական մասնաշենքի դիմաց այսօր հառնում է բուհի հիմնադիր ռեկտորի կիսանդրին' որպես հիշեցում մարդկային առաքինության, մասնագիտական պատվախնդրության ու պայմանականություններ չհանդուրժող մարդասիրության մասին, հիշեցում բոլորին առ այն, որ գործն է անմահ»:
Գավառ քաղաքի ավագանու որոշմամբ համալսարանի հարակից փողոցն անվանակոչվել է Հրանտ Հակոբյանի անվամբ: