Աստղիկ Սաֆարյան. «Ամուսնության մասին երեւի պետք է սկսեմ մտածել»

Աստղիկ Սաֆարյանն այսօր Փարիզում է, մեկ շաբաթից կմեկնի Բարսելոն, իսկ Սուրբ Ծնունդը պատրաստվում է նշել Իտալիայում:

-Ինչպե՞ս ես նշել ձմեռային այս տոները փոքր ժամանակ եւ եթե համեմատես վերջին շրջանի Նոր տարիներիդ հետ, որո՞նք են ավելի հետաքրքիր ու հեքիաթային եղել:

-Միայն գիտակցությունս է ավելացել տարեցտարի, իսկ ուրախությանս չափը միշտ էլ նույնն է եղել: Իհարկե, վերջին տարիներին Երեւանում չեմ նշում, բայց ամենից կարեւորն այն է՝ որ երկրում էլ նշեմ, միեւնույն է, նշում եմ ընտանիքիս անդամների հետ, քանի որ Նոր տարին համարում եմ ընտանեկան տոն:

-Ձմեռ պապիկից ստացած ամենատպավորիչ նվերդ եւ ե՞րբ ես բացահայտել, որ նրան փոխարինում են ծնողներդ:

-Տպավորիչ նվերներ միշտ էլ եղել են, շատ օրիգինալ նվերներ եմ ստացել նաեւ երկրպագուներիս կողմից: Իսկ Ձմեռ պապիկին փոխարինողների մասին հենց սկզբից էլ տեղյակ եմ եղել, քանի որ հայրիկիս հետ մենք շատ մտերիմ ենք եւ միշտ անկեղծ միմյանց հանդեպ: Նա երբեք էլ չի խաբել մեզ նույնիսկ այդ հարցում, եւ հիշում եմ, որ նվերների վրա միշտ գրում էր՝ «Ձմեռ պապայից»:

-Այս անգամ ի՞նչ ձեւաչափ ես ընտրել տոները նշելու համար:

-Օհ, այս տարի, եթե անկեղծ լինեմ, որոշել էի գալ Երեւան, բայց հետո մտափոխվեցի, որոշեցի այլ կերպ անցկացնել տոները: «Christmas»-ին կլինեմ Փարիզում ընտանիքիս եւ փարիզյան լավ ընկերներիս հետ, հետո Նոր տարին կդիմավորեմ Բարսելոնում, իսկ Սուրբ Ծնունդը պլանավորում եմ անցկացնել Իտալիայում: Համոզված եմ, որ գալիք տարվա տոներն ինձ համար կլինեն շատ հիշարժան:

-Ի՞նչ նվեր ես անելու ինքդ քեզ:

-Հետաքրքիր հարց էր, կարելի է մտածել այդ ուղղությամբ:

-Ի՞նչ սպասելիքներ ունես 2013-ից. կանխազգացում չկա, որ բեկումնային փոփոխություններ կլինեն կյանքումդ. օրինակ, ամուսնություն:

-Բնական է, սպասելիքներ շատ ունեմ, ինչպես նաեւ հետաքրքիր եւ նոր նպատակներ ու ցանկություններ: Իսկ ամուսնության վերաբերյալ, անկեղծ ասած, երբեք հատուկ չեմ մտածել՝ թողնելով այդ հարցը Աստծո հայեցողությանը, բայց երեւի պետք է սկսեմ մտածել: Կան շատ լուրջ նպատակներ, որոնք հուսով եմ, կիրականանան գալիք 2013-ին:

 Նյութը՝ Bravo.am-ի