Արմավիրի մարզպետն Ամանորին ոչ ոքի չի զանգում

Ամանորին հաշված օրեր են մնացել, ամենուր տոնական եռուզեռ է: Փողոցներում կարող ենք հանդիպել խանութներից ծանրաբեռնված տուն շտապող մեր համաքաղաքացիներին: Տոնական այս տրամադրությունը տիրում է նաև մեր պաշտոնյաններից շատերի տանը:

Ձեզ ենք ներկայացնում հարցազրույցների շարքը մարզպետների հետ, որոնցում նրանք պատմում են իրենց ամանորյա նախապատրաստությունների մասին:

Արմավիրի մարզպետ Աշոտ Ղահրամանյանը նշեց, որ իրենց տանն էլ արդեն տոնական տրամադրություն է տիրում: Ինքն էլ կնոջն է օգնում գնումներ կատարել:

-Պրն Ղահրամանյան որտե՞ղ եք պատրաստվում դիմավորել Ամանորը և ու՞մ հետ:

-Ես միշտ Ամանորը դիմավորում եմ մեր տանը' երեխաներիս և թոռնիկներիս հետ միասին: Այս տարի էլ բացառություն չի լինի և կնշենք մարզում' մեր տանը:

-Պրն մարզպետ, Ձեր տանն արդեն տոնական թոհուբոհը սկսվե՞լ է:

-Անկեղծ ասած այդ աշխատանքներով կինս է զբաղվում, իսկ երբ օգնության կարիք է ունենում, ես անպայման օգնում եմ:

-Իսկ կոնկրետ ի՞նչ հարցերով եք օգնում:

-Դե, օրինակ, ասենք առևտրի, եթե ինչ-որ մի բան պակաս է, ես եմ այդ ամենով զբաղվում:

-Տոնածառն արդեն տեղադրե՞լ եք:

-Անկեղծ ասած երկու տարի է' տոնածառ չենք դնում: Անցած տարի Նոր տարվա նախօրեին եղբայրս մահացավ, իսկ այս տարի կնոջս մայրն է մահացել, դեռ չգիտենք' տեղադրել, թե ոչ:

-Իսկ թոռնիկները չե՞ն պահանջում:

-Բնականաբար պահանջում են, ընդառաջելով փոքրերի ցանկությունը' երևի թե կդնենք:

-Պրն Ղահրամանյան, Ձեր ամանորյա սեղանին ի՞նչ ճաշատեսակներ են լինում: Խոզի բուդը և՞ս անպակաս է:

-Անկեղծ ասած խոզի բդի հանդեպ նախասիրություն չունենք, ավելի շատ տնական և գյուղական ուտելիքներին ենք առաջնահերթություն տալիս: Ասենք' պասուց դոմլա, աղանձ, քրճիկ:

-Ինչո՞վ է յուրահատուկ Ամանորը հենց Ձեր տանը:

-Ամանորի ամբողջ նշանակությունը ընտանեկան տոն լինելու մեջ է: Երբ հայրս և մայրս կենդանի էին, բոլորս հավաքվում էինք գյուղում և այդպես էինք նշում: Դա մեր տան մեջ ընդունված է:

-Առաջինն ու՞մ եք շնորհավորում կուսակցական ընկերներից կամ հարազատներից:

-Առանձնապես ոչ ոքի զանգով չեմ շնորհավորում: Հունվարի 1-ից առաջ բոլորին շնորհավորական բացիկներ եմ ուղարկում:

-2012թ. ինչպիսի՞ տարի էր Ձեր մարզի և Ձեզ համար:

-Ե'վ իմ, և' մարզի համար 2012թ. բավականին հաջող տարի էր: Բացի ցորենի արտադրությունից մնացած բոլոր մշակաբույսերի արտադրության մեջ 10-25%-ի աճ ենք գրանցել: Միայն այս տարի նախորդ տարվա համեմատ 10 հազար տոննայից ավել խաղող է ընդունվել: Մարդահամարով մեր մարզն այն մարզն է, որտեղ ազգաբնակչությունն ավելացել է: Սեպտեմբերի 1-ին նախորդ տարվա համեմատ 287 երեխա ավել է հաճախել դպրոց, քան նախորդ տարիներին:

-Իսկ 2013 թվականից ինչպիսի՞ սպասելիքներ ունեք:

-Ավելի լավը, քան 2012թ, և ավելի շատ պետք է աշխատել, քան 2012-ին:

Slaq.am

Անի Մարկոսյան