Գագիկ Բեգլարյանը` Երևանի քաղաքապետի պաշտոնից հրաժարվելու պատճառների մասին

ՀՀ ՏԿ նախարար Գագիկ Բեգլարյանն անակնկալ կերպով համաձայնեց խոսել Երևանի քաղաքապետի պաշտոնից հրաժարվելու պատճառների մասին: «Ժողովուրդ»-ի հարցին, թե ինչ է տեղի ունեցել 2010-ի դեկտեմբերի 4-ին՝ Պլասիդո Դոմինգոյի հայտնի համերգից մեկ օր անց, Բեգլարյանը պատասխանեց.

«Երկու տղամարդկանց մեջ տղամարդկային զրույց, մեկը եղել է Բեգլարյան Գագիկը, մյուսը՝ Կանդայան Արամը: Զրույցին մասնակից չի եղել ոչ ոք: Մինչև այսօր ո՛չ Գ. Բեգլարյանը, ո՛չ Արամը որևէ հայտարարություն չեն արել: Չի եղել ոչ մի ձայնագրություն և վկայություն: Իսկ բոլոր խոսակցությունները հեռուստատեսությամբ և մամուլում նախագահի խոսնակի կողմից հերքվել են մեկ օր անց»:

Բեգլարյանը հավաստիացրեց, որ ծեծ ու առևանգում ևս չի եղել. «Քանի որ ինֆորմացիան սխալ գնաց, մարդիկ մտածում էին, որ Կանդայանը «Մետաքս»-ի նկուղներում է, որ նրան գողացել, տարել են Հայաստանից դուրս կամ որ նա դաժան ծեծի է ենթարկվել: Բայց այդ ընթացքում մենք նրա հետ նորմալ զրուցում էինք... Թեյ էլ ենք խմել նույնիսկ: Իմիջիայլոց ասեմ, հաճելի, նորմալ զրուցակից է»:

Ուղիղ 2 տարի առաջ Հայաստանի հասարակական-քաղաքական կյանքը խառնվեց իրար, որի առիթը եղավ դեկտեմբերի 3-ին Կարեն Դեմիրճյանի անվան մարզահամերգային համալիրում կայացած աշխարհահռչակ իսպանացի տենոր Պլասիդո Դոմինգոյի մենահամերգը և դրան հաջորդած Երևանի նախկին քաղաքապետ Գագիկ Բեգլարյանի հրաժարականը:

Արդար լինելու համար պետք է նշել, որ Բեգլարյանի կողմից ՀՀ նախագահի աշխատակազմի արարողակարգի բաժնի աշխատակից Արամ Կանդայանին ապտակելու սկանդալային տեղեկության սկզբնաղբյուրը ֆեյսբուքյան իմ էջում արված գրառումը դարձավ: Իհարկե, այդ օրերին միջադեպի կողմերից որևէ մեկը չխոսեց ու չմանրամասնեց, թե ինչ է եղել: Եվ ահա 2012-ի դեկտեմբերի 21-ին՝ «աշխարհի վերջին» օրը, ՀՀ տրանսպորտի և կապի ներկայիս նախարար Գագիկ Բեգլարյանն անակնկալ կերպով համամաձայնեց խոսել 2 տարի առաջ տեղի ունեցած միջադեպի մասին:

Բայց ամեն ինչի մասին՝ հերթով:

ԲՀԿ-ի խնդիր չի եղել

-Պարո՛ն Բեգլարյան, Դուք ՀՀԿ-ի գործադիր մարմնի անդամ եք, մշտապես՝ շաբաթը մեկ պարբերականությամբ, նիստերի եք մասնակցում: Ի՞նչ է այդքան քննարկում ՀՀԿ-ն, եթե նույնիսկ մրցակից չունի նախագահական ընտրություններում:

-Եթե Ձեզ թվում է, որ Հանրապետական կուսակցությունը, կանգնելով իշխանության գլխին և լինելով ամենամեծ քաղաքական ուժը, իր գործադիրի նիստերում քննարկում է միայն ընտրությունների հարցը, սխալվում եք:

-Քննարկվե՞լ է հարցը՝ ԲՀԿ-ն ինչի արդյունքում նման որոշում կայացրեց. վախեցրի՞ք, շանտաժի մեխանի՞զմ գործի դրվեց, թե՞ կոմպրոմատների փաթեթ բացվեց:

-Ընդհանրապես մեր գործադիրում ԲՀԿ-ի խնդիր՝ որպես այդպիսին, չի եղել: Մենք մեր նախապատրաստական աշխատանքներն ենք քննարկել՝ ընտրությունների մասին: Այսինքն՝ մյուսների նման մեր թեկնածուին գովազդելու խնդիր չունենք: Միայն աշխատանքով պետք է ներկայանանք և կարողանանք այնպես կազմակերպել աշխատանքները, որպեսզի ժողովուրդը մեր թեկնածուին ձայն տա:

-Այնուամենայնիվ, Ծառուկյանը բրյուսելյան այցից հետո վերջին հանդիպումն ունեցավ Սերժ Սարգսյանի հետ, որից հետո որոշեց չառաջադրվել: Ձեր կուսկացության նախագահը ձեզ հայտնե՞լ է, թե ինչ զրույց է ունեցել ձեր նախկին կոալիցիոն գործընկերոջ հետ:

-Դուք՝ լրոգրողներդ, չգիտեմ ինչի, Բարգավաճ-Հանարապետական փոխհարաբերություններն անընդհատ բարդացնում եք: ԲՀԿ-ը ղեկավար՝ Ծառուկյան Գագիկը, իր հայտարարությունով սահմանափակեց ամեն ինչ: Իսկ թե մինչ այդ ինչ կարգի զարգացումներ և խոսակցություններ են եղել նախագահի և Ծառուկյանի, Ծառուկյանի և իր կուսակիցների միջև, դրանք ներքին խոսակցություններ են:

-Լավ, իսկ չե՞ք քննարկել՝ Ծառուկյանն ինչու ասաց, որ կոռուպցիայի վրա նստած՝ կոռուպցիա են ման գալիս:

-Յուրաքանչյուր մարդ իր հայտարարության համար ինքն է պատասխան տալիս: Եթե ինչ-որ մեկի հայտարարությունը քննարկում ենք տարբեր տեղերում, դա հավասար է բամբասանքի:

-Բայց նա հստակ հասցեատիրոջն էր ուղղել սլաքը:

-Եթե ինքն ուղղել էր, հարցն ուղղե՛ք պարոն Ծառուկյանին, նա էլ կոնկրետ կասի՝ ինչի համար է ասել:

-Այսինքն՝ դուք չե՞ք վիրավորվել՝ որպես իշխող կուսակցություն:

-Քաղաքականության մեջ վիրավորվել բառն ընդհանրապես գոյություն չունի: Ամեն մարդ թող իր ասածի համար պատասխան տա:

-Պարո՛ն Բեգլարյան, գործադիրում չե՞ք քննարկել ՀՀԿ-ական պատգամավոր Մհեր Սեդրակյանի՝ լրագրողի ծնոտը կոտրելու մասին հնչեցրած սպառնալիքը (իհարկե, երեկ նա ներողություն խնդրեց):

-Ընդհանրապես էդ հարցը մեզ մոտ ամենացավոտն է: Բայց եկե՛ք հասկանանք, որ մենք խոսում ենք և՛ մամուլի ազատությունից, և՛ ընդհանրապես մարդկային փոխհարաբերություններից: Ես, իհարկե, չեմ ողջունում սպառնալիքների տոնով խոսելը, բայց կասկածում եմ, որ մարդը կարող է առանց պատճառի, անտեղի տեղը մյուսին վիրավորել: Ինչ-որ նախաբան է եղել: Ի վերջո, լրագրողը, որ զինված է կամերայով և միկրաֆոնով, կարող է այն պահից ձայնագրել, երբ իրեն ձեռնտու է: Այսինքն՝ հավասարություն չկա:

-Նույն տրամաբանությամբ լրագրողն էլ չունի մանդատ, չունի զնեք, ինչն ունի Մհեր Սեդրակյանը:

-Մհերը մենակ կանգնած էր ԱԺ-ի միջանցքում, որտեղ կանգնած էր լրիվ նույն հնարավարություններով և նույն դիրքով նաև լրագրողը:

-Լավ, այնուամենայնիվ, երևույթը Ձեզ համար ընդունելի՞ է:

-Ո՛չ, ո՛չ:

-Բայց Դուք ևս նմանատիպ պատմության մեջ հայտնվեցիք մոտ 2 տարի առաջ, երբ հայտնի դարձավ, որ ապտակել եք ՀՀ նախագահի աշխատակազմի արարողակարգի բաժնի աշխատակից Արամ Կանդայանին:

-Ես համաձայն չեմ Ձեզ հետ: Ես երբեք նմանատաիպ պատմության մեջ չեմ եղել: Ուղղակի լրագրողներն են 2 տարի շարունակ իմ անունը արծարծել, երբ ուրիշների հետ ևս նմանատիպ պատմություններ են եղել: Դա շատ անարդար է, որովհետև, եթե մնացած բոլոր պատմություններում կոնկրետ կա ծեծող և ծեծվող, կշտամբող կամ կշտամբվող, վիրավորող և վիրավորված, իմ դեպքում չկա: Եթե որոշ մարդկանց շատ է պետք, որ յուրաքանչյուր միջադեպի առիթով իմ անունը շոշափվի, պիտի հիասթափեցնեմ, ես 2002-ից աշխատել եմ թաղապետ, 90-ականներին աշխատել եմ Գերագույն խորհրդի պատգամավոր, էս կարգի միջադեպերում ես երբեք չեմ հայտնվել:

-Չե՞ք ապտակել, չե՞ք ծեծել Կանդայանին:

-Մեր մեջ ինչ եղել է՝ երկուսիս խնդիրն է: Այդ մասին ուրիշ ոչ ոք խոսելու իրավունք չունի: Ո՛չ Կանդայանը, ո՛չ ես այդ մասին չենք խոսել:

-Այդ դեպքում ինչո՞ւ հրաժարական տվեցիք:

-Հարցը ապտակել-չապտակելը չէ: Այդ պահին ես որոշեցի, որ շատ կարևոր է իմ հրաժարականը, որովհետև որպես քաղաքապետ՝ ես այդ տիպի խոսակցություն չպետք է վարեի: Ես գտա, որ ես դրանով չարաշահել եմ նախագահի, կուսակցության և իմ ժողովրդի վստահությունը: Հասկանալով դա՝ որոշեցի հրաժարական տալ:

-Լավ, ո՞վ է մեղավոր:

-Էստեղ ո՛չ Դոմինգոն է մեղավոր, ո՛չ Բեգլարյան Գագիկը, ո՛չ Կանդայան Արամը: Եղել է տղամարդկային խոսակցություն:

-Երկար ժամանակ Ռոբերտ Քոչարյանը ՀՀ-ում տղամարդ էր փնտրում: Հիմա, որպես ունկնդիր, իմ տպավորությունն այնպիսին էր, որ, այնուամենայնիվ, տղամարդու պակաս կա երկրում:

-Համաձայն չեմ: Մեր երկրում նորմալ տղամարդիկ շատ կան՝ թե՛ պաշտոնյա, թե՛ անպաշտոն:

-Հիմա հիմնավորե՞մ. տղամարդկայնի զրույցը դարձավ հրապարակային քննարկման առարկա, ու ի վերջո, հանգեցրեց, Ձեր հրաժարականին:

-Ես իսկապես հասկացա, որ ի պաշտոնե նման զրույցներ վարելու իրավունք չունեի, որի համար ներողություն եմ խնդրում Երևան քաղաքի բոլոր բնակիչներից: Ժողովո՛ւրդ ջան, կներեք, որ մի զրույցի պատճառով հրաժարական եմ տվել և չեմ կարողացել 3.5 տարուց մի քիչ պակաս ծառայել ձեզ:

-Հիմա Դուք նեղացա՞ծ չեք գործող իշխանությունից:

-Ես նեղացած եմ միայն ինձանից: Ուրիշ ումի՞ց պետք է նեղանամ: Եթե զրույցը վարել եմ ես, եթե հրաժարականը տվել եմ ես, նեղանալու ի՞նչ խնդիր կա ինչ-որ մեկից:

-Պարոն Բեգլարյան, ամեն ինչ գաղտնազերծեցիք, կասեք ի վերջո ինչից էր անհրաժեշտություն առաջացել ունենալ տղամարդկային զրույց: Ին՞չ էր կատարվել Դոմինգոյի համերգի ժամանակ:

-Նախ՝ սկսենք նրանից, որ ես հրավիրատոմս չեմ ստացել, ես զանգ չեմ ստացել, որ Դոմինգոյի համերգին ներկա է լինելու նաև հանրապետության նախագահը: Ես ստացել եմ տոմսեր՝ իրենց տեղերով: Տոմսերը տվել եմ կնոջս, որը դասական երաժշտության սիրահար է, ընկերուհու հետ գնացել է համերգ: Նստած է եղել իր տեղում: Կանդայանը փորձել է մի քանի անգամ նրանց տեղափոխել, խախտել է էթիկայի նորմերը, հետո վերջում հասկացել է, որ մարդիկ նստած են իրենց տեղում և ոչ մեկին չեն խանգարում: Ես հաջորդ օրը միայն մի բան եմ ճշտել նրա հետ՝ ի՞նչն է եղել պատճառը, դու չե՞ս նկատել, որ նրանք իրենց տեղում են նստած:

-Իսկ Ձեր տղամարդկային զրույցը որտե՞ղ է տեղի ունեցել:

-Իմ մեքենայի մեջ:

-Նախագահական նստավայրի տարածքո՞ւմ, թե՞ հեռու:

-Նախագահի նսստավայրից դուրս: Հետք քաղաքավարի իջել ենք մեքենայից և զրույցը շարունակել քաղաքապետարանում:

-Այդ դեպքից հետո մտադրություն ունե՞ք քաղաքապետի թեկնածու առաջադրվել 2013-ի մայիսին:

-Այդ հարցը կորոշի կուսակցությունը: Եվ ում կառաջադրի կուսակցությունը, ես կպաշտպանեմ նրան:

Ցանկացած սխալ գալիս է մեզանից

-Դուք գո՞հ եք այսօրվա Ձեր կարգավիճակից:

-15 տարեկանից սկսած՝ ես իմ կարգավիճակից գոհ եմ, որովհետև կյանքի նկատմամբ այլ մոտեցում ունեմ: Երբեք ինչ-որ խնդրի համար դիմացինիս չեմ մեղադրում: Փորձում եմ իմ մեջ գտնել սխալները, որոնք ես արել եմ: Կյանքը տրված է մեզ, որ շտկենք մեր բոլոր սխալները, վերանայենք մեր մոտեցումները՝ առանց քննադատելու ուրիշին: Ցանկացած սխալ գալիս է մեզանից:

-Սերժ Սարգսյանը վերջերս խոսեց «ատկատների» մասին, որոնք առկա էին նաև Ձեր նախարարությունում, Վերացրե՞լ եք:

-«Ատկատների» մեզ մոտ սահմանափակել ենք, բայց կոռուպցիոն ռիսկերը դեռևս գոյություն ունեն, ինչի վերացման համար առաջին հերթին պետք է քաղաքաշինության ոլորտում գործող նորմատիվային ակտերը փոխել, որոնք գալիս են դեռ խորհրդային տարիներից: Այսինքն՝ գլխից պիտի այդ բարեփոխումներին անենք, որ խարդախության, կեղծիքի տեղ չմնա:

-Եվ ի՞նչ է արվել այդ ուղղությամբ:

-Մենք ունենք ՀՀ նախագահի հանձնարարությունը, այդ ուղղությամբ քրտնաջան աշխատում ենք: Նույն ակտերի մասով հանձնարարություն է տվել նաև կառավարությանը, որպեսզի արագ դրանք վերանայվեն: Ու երևի 2013-ին այդ խնդիրը էլ չենք ունենա:

«Ժողովուրդ» օրաթերթ