«ՀԺ». Տեր-Պետրոսյանն, ամենայն հավանականությամբ, կխոսի այսօր

Սպասվում էր, որ շաբաթ օրը կայացած ՀՀՇ համագումարում Հայ ազգային կոնգրեսի առաջնորդ Լևոն Տեր- Պետրոսյանը կխոսեր առաջիկա նախագահական ընտրություններում իր առաջադրվելու մասին: Սա վերջին շրջանում ներքաղաքական կյանքում առանցքային սպասումներից մեկն էր, թերևս, այս առումով ամենավերջինը: Սրանից առաջ տևական ժամանակ հայությունն ու քաղաքական շրջանակները սպասում էին ԲՀԿ նախագահ Գագիկ Ծառուկյանի առաջադրվել-չառաջադրվելու մասին հայտարարությանը:

Մինչ ՀՀՇ համագումարը՝ Լևոն Զուրաբյանը հայտարարել էր, թե համագումարում Տեր-Պետրոսյանը, հնարավոր է, ակնարկներ անի իր առաջադրման վերաբերյալ՝ չբացառելով բոյկոտը: ՀՀՇ համագումարում, սակայն, Տեր- Պետրոսյանը որևէ բան այդպես էլ չասաց առաջադրման թեմայի շուրջ: Նրա ելույթում անգամ ակնարկ չկար դրա մասին, այսինքն՝ ակնարկ, որը թույլ կտար ենթադրել կառաջադրվի նա, թե՝ ոչ:

«Իհարկե, ես գիտեմ՝ ինչ եք սպասում, որ ասեմ: Բայց ձեզ հուսախաբ եմ անելու: Այս իմ ամբողջ ելույթը ինչի՞ արեցի՝ ես սպասում եմ: Ես դիմել եմ բոլոր գերտերություններին՝ Ամերիկային, Չինաստանին, Ռուսաստանին, Եվրամիությանը, մինչև նրանց հավանությունը չստանամ, ես չեմ կարող ձեզ պատասխան տալ: Ուրեմն, խնդրում եմ, մի երկու օր էլ սպասեք, բոլոր գերտերությունները ինձ խոստացել են, հիմա գլուխ են ջարդում, նստած ստրատեգիան են որոշում, ինձ խոստացել են երկու օրից պատասխանել, երկու օրից դուք էլ այդ պատասխանը կստանաք»,- ի պատասխան այդ սպասումների՝ կատակեց Լևոն Տեր-Պետրոսյանը:

Եվ այնուամենայնիվ, Լևոն Տեր-Պետրոսյանի կարճ ելույթը, որը եթե նույնիսկ վերաբերում էր ներքաղաքական կյանքում տեղի ունեցած վերջին զարգացումներին, ապա միայն՝ այլաբանորեն, հիմք էր հանդիսացել, որպեսզի մի շարք քաղաքական գործիչներ, ինչպես Գագիկ Ջհանգիրյանը, Գուրգեն Եղիազարյանը, հայտարարեն, թե այդ ելույթը լսելուց հետո ինչպես կարելի է դեռ կասկածել, իհարկե՝ առաջադրվելու է: Երեկ էլ որոշ լրատվական կայքերում տեղեկություն տարածվեց, թե առաջին նախագահն իր առանձնատանը, մերձավոր շրջապատի մասնակցությամբ, երեկոյան հավաք է անելու, որի ընթացքում էլ հայտնելու է նախագահական ընտրությունների ձևաչափի մասին: Ըստ այդ հրապարակումների, Տեր-Պետրոսյանը հայտարարելու էր ոչ միայն չառաջադրվելու, այլև ընդհանրապես ընտրությունները բոյկոտելու մասին: Ավելի ուշ, սակայն, ՀԱԿ-ից հերքեցին հավաքի մասին լուրերը, նշելով, որ Տեր-Պետրոսյանը, ամենայն հավանականությամբ, կխոսի այսօր: