Վարկանիշավորումը` ախտորոշիչ գործընթաց

Վիվա Սել-ՄՏՍ ընկերությունում այօիր տեղի է ունեցել հանրակրթական և բարձրագույն ուսումնական հաստատությունների վարկանիշավորման համակարգերի շնորհանդեսը, որին մասնակցել են ՀՀ կրթության և գիտության նախարար Արմեն Աշոտյանը և Վիվա Սել-ՄՏՍ ընկերության տնօրեն Ռալֆ Յիրիկյանը: Շնորհանդեսի սկզբում ՀՀ կրթության և գիտության նախարար Արմեն Աշոտյանն իր երախտագիտությունն է հայտնել Վիվա Սել-ՄՏՍ ընկերությանը և անձամբ պարոն Յիրիկյանին.

«Շնորհակալություն երկար և ձիգ տարիների ընթացքում կրթության ոլորտի նկատմամբ ունեցած խորքային գնահատականի և վերաբերմունքի, ինչպես նաև այս տարվա խիստ առարկայական համագործակցային ծրագրերի հաջող իրականացման համար: Մեր համատեղ ծրագրերը, որոնք ունեն ռազմավարական բնույթ և երկարաժամկետ օգտագործման համար են նախատեսված, օգնում են կրթական համակարգին՝ ձեռք բերել լրացուցիչ հմտություններ՝ Հայաստանում ժամանակակից կրթական նոր մոտեցումներ ներդնելու համար: Վարկանիշավորումը հենց այդ երևույթի ամենավառ ապացույցներից մեկն է: Համաշխարհային մակարդակով վարկանիշավորման համակարգերը փայլուն են աշխատում և խիստ արժանահավատ են. շատ հաճախ ազգային կառավարությունները հիմք են ընդունում դրանք՝ ֆինանսական աջակցություն և տարկետում տրամադրելու համար: Վարկանիշավորման ազգային համակարգերը լրամշակվել են՝ աշխարհի լավագույն փորձը հաշվի առնելով»,-նշել է նախարարը՝ հավելելով, որ վարկանիշավորումը նպատակ ունի թափանցիկության և հաշվետվողականության, օբյեկտիվ հիմքերի վրա կրթական համակարգի իրական պատկերը ցույց տալ: «Մյուս կողմից վարկանիշավորումը հնարավորություն է տալիս ախտորոշել առկա խնդիրները, թույլ կետերը և կարևոր հող ստեղծել պետական քաղաքականության գործիքների՝ առավել թիրախային և նպատակային օգտագործման համար. հիմնականում հանրակրթության ոլորտում հայտնաբերել դպրոցներ, որոնք լրացուցիչ աջակցության կարիք են զգում: Այսինքն, վարկանիշավորումը ոչ միայն դափնիներ շնորհելու, այլև ախտորոշիչ գործընթաց է»,-ընդգծել է նախարարը:

Վիվա Սել-ՄՏՍ ընկերության տնօրեն Ռալֆ Յիրիկյանը, անդրադառնալով վարկանիշավորման համակարգերին, նշել է, որ գործարար ոլորտի համար դա նշանակում է, որ կրթական ոլորտը կդառնա ավելի տեսանելի և թափանցիկ: «Վարկանիշավորումը Արևմուտքում կարևոր գործընթաց է, որն առաջին անգամ կկիրառվի նաև մեր երկրում: Այն խոշոր ընկերություններին թույլ կտա հասկանալ, թե իրականում ինչ մակարդակ է տիրում կրթության, հատկապես բարձրագույն կրթության ոլորտում: Մենք հավատում ենք, որ երկրի զարգացման, տնտեսական մրցունակության մակարդակի բարձրացման նպատակով ուշադրությունը նախևառաջ պետք է սևեռվի կրթական ոլորտին: Սա է պատճառը, որ Վիվա Սել-ՄՏՍ-ը վճռական կանգնած է կրթության ոլորտի կողքին և աջակցություն է ցուցաբերում այն բոլոր ծրագրերին, որոնք ուղղակիորեն և անուղղակիորեն օժանդակում են այն գաղափարին, որ մրցունակության մակարդակը մեր երկրում ավելի է բարձրանում, որն էլ իր հերթին երկրի զարգացման ընթացքն առաջ կտանի ավելի արագ քայլերով»:

ՀՀ բարձրագույն ուսումնական հաստատությունների ազգային վարկանիշավորման համակարգը (մեթոդաբանություն, ցուցանիշներ, հաշվարկի մեխանիզմ) ներկայացրել է ՀՀ կրթության և գիտության նախարարի տեղակալ Կարինե Հարությունյանը, իսկ ՀՀ հանրակրթական ուսումնական հաստատությունների վարկանիշավորման համակարգը (մեթոդաբանություն, ցուցանիշներ, հաշվարկի մեխանիզմ)՝ ՀՀ կրթության և գիտության նախարարության զարգացման ծրագրերի և մոնիթորինգի վարչության պետ Ռոբերտ Ստեփանյանը:

Շնորհանդեսի ընթացքում լրագրողները հարցեր են ուղղել հիմնական բանախոսներին, մասնավորապես, լրագրողներին հետաքրքրել է, թե որ կազմակերպություններն են իրականացնելու վարկանիշավորումը և արդյոք գործընթացում առկա չեն կոռուպցիոն ռիսկեր: Հարցին ի պատասխան՝ նախարարը նշել է, որ 2013 թվականին իրականացվելիք փորձնական վարկանիշավորման պատասխանատու մարմինը կհանդիսանա ՀՀ կրթության և գիտության նախարարությունը՝ որպես մեթոդաբանության հեղինակ և քաղաքականության պատասխանատու: «Տարվա ընթացքում լրամշակելով նախագիծը՝ նախարարության ձեռքը կպահենք գործընթացի զարկերակին: Արդեն մեկ-երկու տարի հետո խնդիրը կարող ենք հանրային քննարկման դնել և թափանցիկ կերպով ընտրել ամենապրոֆեսիոնալ և ամենաարժանահավատ այն կազմակերպությանը, որն ամենից շատ կվայելի հասարակության վստահությունը: Կարծում եմ՝ այս գործընթացում հանրային սեկտորն անփոխարինելի է: Անդրադառնալով կոռուպցիոն ռիսկերին՝ նշեմ, որ նախարարությունը փորձել է հաշվելի և չափելի դարձնել գնահատման ողջ համախումբը և վարկանիշավորման ելքի վրա մարդկային գործոնի ռիսկը հասցնել նվազագույնի»,-նշել է նախարարը՝ հավելելով, որ բուհերի պարագայում հատկապես վարկանիշավորումը կխթանի մրցունակության բարձրացմանը:

Շնորհանդեսի ավարտին կողմերը հայտնել են, որ հաջորդ տարեսկզբին նախատեսվում է ՀՀ կրթության և գիտության նախարարության և Վիվա Սել-ՄՏՍ ընկերության միջև կնքել 2013 թվականի համար համագործակցության հուշագիր, որտեղ, ըստ բանախոսների, կպահպանվեն հին գերակայությունները և սկիզբ կդրվեն նոր ուղղությունների: