Հայ գրատպության 500-ամյակին նվիրված ցուցահանդես Դոնի Ռոստովում

Հայ գրատպության 500-ամյակի շրջանակում ՀՀ մշակույթի նախարարությունը, «Հայ գիրք» հասարակական կազմակերպությունը, ՌԴ Դոնի Ռոստովի հայ համայնքը համատեղ ս. թ. դեկտեմբերի 6-ին ՌԴ Դոնի Ռոստով քաղաքի պետական հանրային գրադարանում կազմակերպել են ցուցահանդես նվիրված հայ տպագիր գրքին: Ցուցահանդեսին ներկայացված են Հայաստանի շուրջ 30 հրատարակչությունների 200 անուն հայերեն և ռուսերեն գիրք:

Ցուցահանդեսի շրջանակում տեղի է ունեցել «Հայ գիրքը 21-րդ դարում» թեմայով կլոր սեղան, ինչպես նաև՝ «Արեգ» հրատարակչության «Հայաստանի հրաշալիքները» գրքի շնորհանդեսը:

Հայաստանի Հանրապետության և ՌԴ Ռոստովի մարզի գրադարանների, հրատարակչությունների և գրավաճառ կազմակերպությունների միջև համագործակցությունը հնարավորինս արդյունավետ դարձնելու ուղղությամբ ձեռք են բերվել մի շարք պայմանավորվածություններ:

Ցուցահանդեսի բացմանը ներկա էին Դոնի Ռոստովում ՀՀ գլխավոր հյուպատոս Արարատ Գոմցյանը, Ուկրաինայի Հանրապետության գլխավոր հյուպատոս Վիտալի Մոսկալենկոն, Հայ Առաքելական եկեղեցու քահանաներ, Ռոստովի մարզի գրադարանների տնօրեններ, հայ և ռուս հրատարակիչներ, գրավաճառներ: Ցուցահանդեսը կշարունակվի մինչև 2013 թ. հունվարի 9-ը: