«Գեներալի աղջիկը» սերիալից Աննա Հարությունյանը՝ իր և օձի նմանությունների մասին

«Գեներայի աղջիկը» հեռուստասերիալից հեռուստադիտողին ծանոթ Լուսինեի, իսկ էկրանից այս կողմ ՝ Աննա Հարությունյանի հետ զրուցելիս  ցանկանում էինք ընդամենը իմանալ, թե ինչպես է պատրաստվում դերասանուհին նշել Ամանորը, սակայն lurer.com-ին նա ավելի հետաքրքիր փակագծեր բացեց.

-Աննա, որտե՞ղ և ինչպե՞ս եք պատրաստվում տոնել Ամանորը:

-Տանը, ընտանեկան ջերմ մթնոլորտում՝ ինչպես բոլոր տարիներին: Չնայած՝ ունեմ գաղտնի երազանք. դրսում անցկացնել Նոր տարին՝ արտառոց պայմաններում: Կարծում եմ՝ հաճելի կլինի:

-Իսկ ո՞ր երկիր կցանկանայիք մեկնել՝ Ձեր երազանքն իրականացնելու համար:

-Այս դեպքում ավելի շատ կարևոր է ոչ թե երկիրը, այլ՝ իրավիճակը: Չեմ ուզում ուղղակի տոմս վերցնել և ուղևորվել որևէ երկիր:
Օրինակ՝ հետաքրքիր կլինի, եթե պարտադրված լինեմ արտերկրում դիմավորել տարեմուտը, այն էլ՝ աշխատանքային իրավիճակում:
Ուզում եմ զգալ, թե որպես դերասանուհի ինչպես կլինի, եթե ընտանիքից հեռու լինեմ այս օրը:

-Կմտաբերե՞ք ամենատպավորիչ Նոր տարին. ինչո՞վ էր այն արտառոց:

-Պետք է ասեմ, որ ամենաշատը տպավորվել է նախորդ օձի տարին: Քանի որ ինքս ծնվել եմ այդ կենդանակերպի նշանի տակ, 12 տարի առաջ իմ գումարով գնեցի այդ տարվա խորհրդանիշը՝ փոքրիկ օձի տեսքով: Ու թեև սովորություն չունեմ փափուկ խաղալիքներ գնելու, այնուամենայնիվ այս տարի պատրաստվում եմ գնել տարին խորհրդանշող որևէ իր:

-Աննա, կցանկանայի շարունակեիք հետևյալ տողերը. «Սիրելի Ձմեռ Պապ, ուզում եմ, որ այս տարի ինձ…»

- Ինձ համար լինի առողջ, բուռն ստեղծագործական, հարուստ տպավորություններով, ճանապարհորդություններով լի տարի:

-2013 թվականի ամենակարևոր 3 ցանկություններդ, որոնք ցանկանում ես իրականանան:

-Դրանց մասին չեմ ուզում խոսել ոչ թե այն պատճառով, որ հանրությունը չիմանա, այլ երբեք չեմ խոսում իմ ցանկությունների, նպատակների մասին: Մի փոքր սնահավատ եմ. կարծում եմ, որ դրանց էներգիան կորչում է, և հետագայում դրանք չեն կատարվում, կամ եթե նույնիսկ կատարվում են, ապա ինձ համար արդեն անակնկալ չի լինում:
 

-Նշեցիք, որ սնահավատ եք. արդեն հասցրե՞լ եք ուսումնասիրել, թե ինչ են կանխագուշակում աստղերը Ձեր կենդանակերպի նշանի տակ ծնվածների համար:

-Ճիշտն ասած՝ ամեն տարի ես ինքս եմ ինձ համար որոշումներ կայացնում, հետևում եմ դրանց և փորձում իրականացնել:

-Իսկ ամանորյա նվերներ արդեն գնե՞լ եք:

-Ի տարբերություն հարազատներիս համար գնվելիք նվերների, որոնք զբաղվածության պատճառով դեռ չեմ գնել, հասցրել եմ ինքս ինձ համար նվեր գնել. քանի որ չգիտես ինչու ոսկեգույնն եմ կապում օձի հետ, նման գործվածքով դեղինի համադրությամբ բաճկոն եմ գնել:

-Քանի որ ծնվել ես օձի տարում, որևէ նմանություն, կապ տեսնո՞ւմ ես քո և նրա բնավորության միջև:

-Հին Ճապոնիայում ասում էին. Դու իսկական օձ ես և դա լավագույն հաճոյախոսությունն էր, ինչը իրականում նշանակում էր, որ դու օձի նման գեղեցիկ ես, սրամիտ, համբերատար, հումորով և դանդաղ մոտենում ես քո որսին: Ես կիսում եմ այս համեմատությունը: Ինքս էլ ճանաչում եմ օձի տարում ծնված շատերի: Իսկ իմ կենդանակերպի սկիզբը կմեկնարկեմ ծննդյանս օրով, որը հունվար ամսին է, միևնույն ժամանակ կամփոփեմ ցանկություններս ու նպատակներս և ամբողջ տարի ձեռնամուխ կլինեմ դրանց իրագործմանը:

 Ռուբինա Հակոբյան
Լուսանկարները՝ bravo.am-ի 
{gallery}210{/gallery}