«ՀԺ». Հրանտ Բագրատյանն՝ ընդդիմության թեկնածո՞ւ

Այն, որ Լևոն Տեր-Պետրոսյանը չի չառաջադրվի առաջիկա նախագահական ընտրություններում, ըստ էության, կանխատեսելի էր: Հիմա, երբ արդեն պաշտոնապես հայտնի է, որ Տեր-Պետրոսյանը չի առաջադրվելու, ով է լինելու ընդդիմության թեկնածուն:

«Երևի հասկանալի է, որ համաժողովրդական այն շարժումը, որ ձևավորվել էր 2008 թվականի նախագահական ընտրություններից առաջ, հիմա հնարավոր չէ արթնացնել՝ առաջին հերթին ժամանակի սղության պատճառով: Երեկ արդեն, սկսվել էր նախագահի թեկնածուների առաջադրումը, որը կավարտվի 2013-ի հունվարի 4-ին: Իշխանական թեկնածու Սերժ Սարգսյանը, փաստորեն, բոլոր հնարավորություններն ունի սահուն կերպով վերարտադրվելու: Ըստ նրա գծած սցենարի էլ, ինչպես հայտնում են իշխանական աղբյուրները, երկրորդ տեղը պետք է գրավի «Ժառանգության» առաջնորդ Րաֆֆի Հովհաննիսյանը (բնականաբար, բավական ցածր տոկոսներով), որն արևմտյան արժեքներ պետք է ներմուծի ՀՀ քաղաքական կյանք, այն է՝ պարտված թեկնածուն պետք է շնորհավորի հաղթած թեկնածուին՝ այդ կերպ փորձելով լեգիտիմացնել Սերժ Սարգսյանին: Պարզ է նաև, որ մնացած մանր-մունր թեկնածուները, որոնց շքերթը միմոսություն է հիշեցնում, որևէ դեր չեն խաղալու: Նրանք բոլորը միասին կարող են առավելագույնը մեկ-երկու տոկոս հավաքել:

Կա, սակայն, ՀՀ նախկին վարչապետ Հրանտ Բագրատյանի գործոնը: Բայց հասկանալի է, որ նրա շուրջը ևս դժվար թե լայն կոնսոլիդացիա տեղի ունենա: Նույն Րաֆֆի Հովհաննիսյանը, համենայնդեպս, դժվար թե համաձայնի աջակցել Բագրատյանին: Գոնե այս պահին դա անհավանական է թվում և չի մտնում գծված սցենարի մեջ: Դաշնակցությունն էլ դեռ չի հայտարարել, թե ինչ ձևաչափով է մասնակցելու ընտրություններին, թեև երեկ տեղի է ունեցել ՀՅԴ Գերագույն ժողովը, և որոշումը կայացված է: ՀՅԴ-ն, սակայն, մինչև վերջերս հակված էր կա՛մ բոյկոտել ընտրությունները, կա՛մ առաջադրել ՀՅԴ ԳՄ ներկայացուցիչ Արմեն Ռուստամյանին, որը դեմ էր իր առաջադրմանը»,-գրում է «ՀԺ»-ն:

Եվ ուրեմն, ով կարող է դառնալ ընդդիմության թեկնածուն առաջիկա նախագահական ընտրություններում: Ինչ է անելու բողոքավոր ընտրազանգվածը, որը, հաշվի առնելով երկրի սոցիալ-տնտեսական խայտառակ վիճակը, ստվար բանակ է կազմում: Երեկ «ՀԺ»-ն փորձեց մի շարք հարցերի պատասխաններ ստանալ Հրանտ Բագրատյանից: Նա, հիշեցնենք, արդեն ՀՀ ոստիկանության անձնագրային և վիզաների վարչությունից նախօրեին վերցրել է նախագահի թեկնածու առաջադրվելու համար անհրաժեշտ վերջին տասը տարում ՀՀ-ում մշտապես բնակվելու, ՀՀ քաղաքացի հանդիսանալու և այլ երկրի քաղաքացի չհանդիսանալու մասին փաստաթուղթը և նախապատրաստվում է ընտրություններին:

- Պարոն Բագրատյան, այս իրավիճակում, երբ արդեն հայտնի է, որ առաջին նախագահը չի առաջադրվելու, ինչպե՞ս եք գնահատում Ձեր շանսերն առաջիկա նախագահական ընտրություններում:

- Ես իմ շանսերը բարձր եմ գնահատում:

- Դուք հնարավոր համարո՞ւմ եք, որ Ձեր շուրջը համախմբում տեղի ունենա, ընդդիմադիր ո՞ր կուսակցությունները Ձեզ կսատարեն:

- Ես կառաջարկեի այդ հարցին անդրադառնալ ավելի ուշ, նախևառաջ պետք է գրանցվել:

- Կարծում եք, խնդի՞ր կարող է առաջանալ գրանցման ընթացքում:

- Ոչ թե խնդիր, պարզապես այս փուլում զբաղված չենք բանակցություններով, այլ զբաղված ենք այլ խնդիրներ լուծելով:

- Ի՞նչ խնդիրների մասին է խոսքը:

- Գրանցման հետ կապված, գրասենյակի վարձակալության հետ կապված, լուրջ թիմ պետք է հավաքենք:

- Կարծում եք, այն ուժերը, որ պատրաստ էին սատարել առաջին նախագահին, Ձեզ կսատարե՞ն:

- Հիմա դժվարանում եմ ասել, շատ գործիչներ հայտնել են սատարելու մասին:

- Անուններ կասե՞ք:

- Հիմա՝ ոչ:

- Հասկանալի է, որ լայն առումով, այս ընտրություններում միասնական թեկնածու լինել չի կարող, մյուս ընդդիմադիր թեկնածուն էլ՝ Րաֆֆի Հովհաննիսյանը, դժվար թե հրաժարվի առաջադրվելուց, բայց հարաբերականորեն միասնական թեկնածու Դուք կարո՞ղ եք դառնալ, ի՞նչ եք կարծում:

- Ես դժվարանում եմ ասել, այդ հարցը մոնիտորինգի չենք ենթարկել: Այս պահին ես այդ հարցին պատասխան չունեմ:

- Ձեր կարծիքով, հնարավո՞ր է նոր համաժողովրդական շարժում ձևավորել:

- Կփորձեմ, բայց դա ռեալ չեմ համարում ժամանակի սղության պատճառով: Ես իմ խնդիրն եմ տեսնում՝ ժողովրդին պատմել, բացատրել, թե ինչպես պետք է կառուցել մեր երկիրը: Նաև ես ներողություն եմ խնդրում մյուս լրատվամիջոցներից, սա իմ վերջին հանպատրաստից հարցազրույցն է, դրանք նվազագույնի են հասցվելու, շուտով այդ հարցով կզբաղվեն համապատասխան լիազորված մարդիկ:

- Արդեն որոշե՞լ եք՝ ով է լինելու Ձեր նախընտրական շտաբի պետը:

- Այո, իմ շտաբի պետը կլինի «Ազատություն» կուսակցության վարչության անդամ Արշակ Ավագյանը, նա լավ կազմակերպիչ է, նախկինում որևէ պաշտոն չի զբաղեցրել: Որոշումը կայացրեցինք մի քանի րոպե առաջ, նա ցանկություն հայտնեց գլխավորել իմ շտաբը, և ես սիրով համաձայնեցի: Շուտով կհայտնենք նաև, թե ով է աշխատելու լրատվամիջոցների հետ, ով է լինելու մամուլի խոսնակը:

- Պարոն Բագրատյան, առաջին նախագահի որոշմանն ինչպե՞ս եք վերաբերվում:

- Առանց մեկնաբանությունների: