Միջկառավարական կոմիտեի նիստ Փարիզում

2012 թ. դեկտեմբերի 20-21-ը Փարիզում՝ ՅՈՒՆԵՍԿՕ-ի կենտրոնակայանում կայացել է «Զինված հակամարտությունների ժամանակ մշակութային արժեքների պաշտպանության 1954 թ. Հաագայի կոնվենցիայի և 2-րդ արձանագրության» միջկառավարական կոմիտեի 7-րդ նիստը, որին մասնակցել է ՀՀ պատվիրակությունը: Հայաստանի Հանրապետության պատվիրակությունը գլխավորում էր Նիդերլանդների Թագավորությունում ՀՀ արտակարգ և լիազոր դեսպան Ձյունիկ Աղաջանյանը, պատվիրակության կազմում ընդգրված էին ՀՀ մշակույթի նախարարության աշխատակազմի արտաքին կապերի վարչության պետի տեղակալի պաշտոնակատար Արտաշես Առաքելյանը, ՀՀ պաշտպանության նախարարության պաշտպանական քաղաքականության վարչության միջազգային ռազմական համագործակցության բաժնի պետի տեղակալ, փոխգնդապետ Արմեն Զաքարյանը, Ֆրանսիայում ՀՀ դեսպանության առաջին քարտուղար Վաներ Հարությունյանը և ՀՀ պաշտպանության նախարարի առաջին տեղակալի աշխատակազմի առաջատար մասնագետ Ալինա Հակոբյանը:

Նիստի աշխատանքները մեկնարկել են 2012 թ. դեկտեմբերի 20-ին. բացման խոսքով հանդես է եկել 6-րդ նիստի նախագահ, Նիդերլանդների ներկայացուցիչ Նութ վան Վուդենբերգը: Այնուհետև ՅՈՒՆԵՍԿՕ-ի գլխավոր տնօրենի մշակույթի հարցերով օգնական Ֆրանչեսկո Բանդարինին ներկայացրել է քննարկվող հարցերի օրակարգը, որին հաջորդել է 7-րդ նիստի նախագահի և բյուրոյի անդամների ընտրությունները: Ձայների մեծամասնությամբ բյուրոյի նախագահող երկիր է ընտրվել Բելգիան /ներկայացուցիչ Բենջամին Հուս/, իսկ փոխնախագահող երկրներն են Խորվաթիան, Էլ Սալվադորը և Ադրբեջանը:

Հիմնական քննարկումները ծավալվել են Ադրբեջանի կողմից ներկայացված «Մշակութային արժեքների պահպանությունը գրավյալ տարածքներում» փաստաթղթի շուրջ: Փաստաթուղթը քննադատվել է միջկառավարական կոմիտեի անդամների կողմից: Հայկական պատվիրակության հետ երկօրյա խորհրդակցություններից հետո կոմիտեի անդամներն ընդունել են որոշման խմբագրված տարբերակը՝ հեռացնելով բոլոր քաղաքական բնույթի տարրերը, որոնք կարող էին կոմիտեի հետագա աշխատանքի քաղաքականացման ու շահարկման առարկա դառնալ: Ի թիվս այլ կետերի, փաստաթղթից հեռացվել են այն ձևակերպումները, որոնցում կային «Ադրբեջանի գրավված տարածքներ» ձևակերպումը, իսկ Ադրբեջանի կողմից պատրաստված փաստաթուղթն ընդունվել է ի գիտություն: