Փախստական կանայք ներկայացրեցին իրենց խնդիրները

Դեկտեմբերի 21-ին Պաշտպանի աշխատակազմի գործունեությանը ծանոթանալու էին եկել մի խումբ փախստական կանայք:

Փախստականների իրավապաշտպան Աշոտ Գևորգյանը փախստական կանանց ներկայացրեց Պաշտպանի գործունեությունը, խոցելի խմբերի հետ տարվող աշխատանքները, հասարակական կազմակերպությունների հետ համագործակցության ոլորտները:

«Կանանց ռեսուրսային կենտրոն» հկ ներկայացուցիչը բարձրաձայնեց փախստական կանանց հետ կապված մի քանի խնդիրներ, մասնավորապես՝ Դարբնիկ գյուղում մանկապարտեզի փակման հարցը, որտեղ հաճախում են հիմնականում փախստականների երեխաներ: Մեծ խնդիր էր նաև գյուղի տրանսպորտը, քանի որ Երևանի քաղաքային երթուղին չի հասնում Դարբնիկ գյուղ: Նշենք, որ այս երկու խնդիրներով Պաշտպանի աշխատակազմն արդեն զբաղվում է:

Փախստական կանայք խոսեցին նաև իրենց խնդիրների մասին, որոնք հիմնականում կապված էին կոնվենցիոն ճանապարհորդական փաստաթղթի անգլիալեզու, փաստաթղթի երկարացման ժամկետների ոչ հստակ լինելու հետ և նշեցին, որ այդ փաստաթղթով չեն կարողանում գործարքներ կատարել, քանի որ շատ դեպքերում այն չեն ճանաչում որպես անձը հաստատող փաստաթուղթ:

Իսկ Իրաքից եկած փախստական կանայք մտահոգ էին, որ որոշ պետական մարմիններում իրենցից պահանջում են եկեղեցու կողմից արևմտահայերենով գրված տեղեկանքը թարգմանել արևելահայերեն:

Հանդիպման ընթացքում խոսվեց նաև ընտանեկան բռնության, կանանց իրավունքների մասին և իրավապաշտպանը հորդորեց ցանկացած իրավախատման դեպքում զանգահարել Պաշտպանի 116 թեժ գիծ:

Փախստականների իրավապաշտպանը հանդիպման ավարտին ներկայացրեց Մարդու իրավունքների պաշտպանի աշխատակազմի և ՄԱԿ փախստականների գծով գերագույն հանձնակատարի գրասենյակի միջև կնքված հուշագիրը, որի շրջանակներում արդեն մի քանի ամիս է իրականացվում է ծրագիր՝ ուղղված փախստականների և ապաստան հայցողների կարքիների գնահատմանն ու իրազեկվածության բարձրացմանը:

Վերջում փախստական կանանց բաժանվեցին ընտանեկան բնռւթյան մասին կրթա-տեղեկատվական նյութեր: Այցելությունը կազմակերպել էր «Կանանց ռեսուրսային կենտրոն» հասարակական կազմակերպության առաջարկությամբ՝ փոխըմբռնման հուշագրի շրջանակներում: