«Որ սխալներ չտվցվի». «անթերի» նախարար Արամ Հարությունյան

Այսօր տարեվերջյան ասուլիս էր հրավիրել նաև «անթերի» պատասխաններով «անթերի» քննություններ անցկացնող նախարարության «անթերի» շեֆը՝ բնապահպանության նախարար Արամ Հարությունյանը: Եվ բնականաբար, «անթերի» նախարարությունն այս տարին էլ փակում է «անթերի» ու բարձր ցուցանիշներով: Ինչպե՞ս, ահա թե ինչպես:

Միլիոն գրեմ Սևանին

Բնապահպանության նախարարությունում մի բան, որ հաստատ ստացվում է՝ Սևանում մանրաձուկ բաց թողնելու շոուներն են: Ամեն տարի միլիոններ է, որ դուրս են գրվում այս նախարարությունում՝ Սևանի ձկնային պաշարների վերականգնման պատրվակով: Մանրաձուկը բաց է թողնվում, իսկ Սևանը շարունակում է իր անձուկ կենսագործունեությունը:

Լճի մաքրման աշխատանքներով զբաղվող ընկերության աշխատակիցները, Սևանով մեկ աշխատանքներ իրականացնելով և սերտ շփումներ հաստատելով հարակից շրջանների բնակչության հետ, փաստում են, որ Սևանում ձուկ չկա: Ձկնաբուծարանների տերերն ընդհանրապես նախարարական «ձկնաբացթողումներին» սիրում են հետևել՝ զուտ կատակերգություն ժանրի հանդեպ համակրանքից ելնելով և բացատրում, որ պատճառը շատ մանր մանրաձուկ բաց թողնելն է. բաց թողնելուց հետո այդ մանր ձկները սատկում են, եթե մի քիչ ավելի նորմալ չափերի ձուկ բաց թողնեն, հնարավոր է և Սևանը վերակենդանանա: Ի դեպ, այն, որ Սևանի նման բնական ավազանը թողած Հայաստանն այսօր սնվում է բացառապես Մասիսի ջրերի մեջ արհեստականորեն աճեցվող ձկներով, արդեն իսկ ամենամեծ թյուրիմացությունն է:

Հանրության շրջանում ավելի քան արմատացած է տեսակետը, որ նման միջոցառումները ոչ այլ ինչ են, եթե ոչ ատկատների, փողերի լվացման համալիր միջոցառումներ (այս հարցում բնապահպանության նախարարությունն ավելի քան առաջընթաց արդյունքներ ունի գրանցած. օրինակ, այսպես կոչված, «օզոնի շերտի պահպանման» միջոցառման շրջանակներում դուրս է գրվում մի քանի միլիոն «եվրոյանոց գրանտ», որի դիմաց Արամ Հարությունյանը տարվա մեջ մի երկու անգամ իր մերձավորների հետ հագեցած ռեստորանային գրաֆիկով ուղևորություն է կազմակերպում այս կամ այն հանգստյան գոտի, հեծանիվ քշում և հաշվետվություններ ներկայացնում, թե ինչպես իր 10 րոպեանոց հեծանվավազքը նպաստեց օզոնի շերտի պահպանմանը և ինչպիսի մեծ ներդրում ունեցավ Հայաստանը համաշխարհային օզոնի շերտի պահպանման գործում: Հաջորդ տարի էլ նախարարությունը Սյունիքի մարզում «կանաչ տնտեսություն» կոչվող ծրագիրն է որոշել իրականացնել՝ էլի գրանտայինների շարքից, որի շրջանակներում ինչ-որ տարածք է կարծես թե առանձնացվելու՝ այնտեղ անասնապահություն ու մեղվապահություն զարգացնելու նպատակով: Չի բացառվում, որ սա դառնա Արամ Հարությունյան-Սուրիկ Խաչատրյան զույգի գերհզոր «պրոյեկտը» և հենց այս «կանաչ տնտեսությունը» Սյունիքի ֆեոդալը վարձակալության կհանձնի Իրանի անասնապահներին):

Նախարարության կայքում ձուկ կա

Բայց բնական է, որ ատկատային խոսակցությունները չեն էլ կարող հուզել «անթերի» նախարար Արամ Հարությունյանին (չէ՞ որ հանրությունն «աշխարհահռչակ» Նոնոյի մասին էլ էր շատ բաներ «դուրս տալիս»՝ թե կրթություն չունի, որսագող է, դա ո՞վ է, որ դնում եք արգելոցի տնօրեն, նախարարը հո տեսա՞վ ու համոզվե՞ց, որ մարդը դեռ մի բան էլ իրենից գրագետ է ու միայն «անթերի» պատասխաններ է տալիս):

«Ձեր տեղեկությունները իրականությանը չեն համապատասխանում: Գնացեք, տեսեք՝ ումի՞ց ենք վերցնում, ի՞նչ կարգով ենք վերցնում և ի՞նչ ենք անում: Նման բան չի կարող լինել, նման բանը մի քիչ էլ վիրավորական է, ի՞նչ է նշանակում ատկատներ. մենք էդքան էլ անփորձ չենք: Սևանում ձուկ կա, իշխանի տարբեր առանձնյակներ են նկատվում: Գիտե՞ք առանձյակը ինչ է: Առանձնյակներին ցույց կտանք, բայց մինչև էդ մի քիչ ուսումնասիրեք»,- մեր հարցին ի պատասխան փորձեց մեզ «տեղը դնել» առանձյակների մեծ գիտակ Արամ Հարությունյանը՝ մեկ անգամ ևս ընդգծելով, թե ինքն իր պոլիտեխնիկական կրթությամբ ու բենզին ծախելով ու՜ր է հասել, գիտելիքային ի՜նչ բարձունքներ է նվաճել՝ դառնալով պետության թիվ մեկ բնապահպանը, իսկ մարդկային որոշ առանձնյակներ՝ մնացել են դեռ էէէ՜…

Նախարարի ասածները փորձեց հաստատել նաև բնապահպանության նախարարի առաջին տեղակալ Սիմոն Պապյանը՝ հորդորելով մտնել իրենց կայք և տեսնել, թե ինչ աշխատանքներ են իրականացրել ու ինչքան ձուկ կա Սևանում:

Փաստորեն, նախարարության կայքում ձուկ կա…

Սանկցիաներ էլ կկիրառենք, բա ո՜նց…

Ու մինչ «անթերի» բնապահպան Արամ Հարությունյանը շարունակում է իր անթերի բնապահպանական գործունեությունը՝ Հայաստանի ձկնային պաշարերն իսկապես մեծ վտանգի տակ են: Սևանը քիչ էր, հիմա էլ մեծ ու փոքր գետերն են կանգնել ձկնային պաշարներից զրկվելու վտանգի ներքո: Պատճառը շահագործվող ՀԷԿ-երն են, որ մի քանի կոպեկ խնայելու պատճառով ձկների ցեղասպանություն են կազմակերպում. օգտագործվող գետերի ձկնային պաշարները ՀԷԿ-ի տարածքում ոչնչանում են: Բավական է հատուկ ցանցապատնեշներ տեղադրել և ՀԷԿ-երի աշխատանքը կարելի է շատ ավելի անվտանգ պայմաններում կազմակերպել՝ հատկապես, որ ՀԷԿ շահագործելը Հայաստանի ամենաեկամտաբեր բիզնեսներից է:

Հարցնում ենք

- Նախարարությունը քայլեր չի՞ պատրաստվում ձեռնարկել այս ուղղությամբ՝ պարտադրելու համար ՀԷԿ շահագործողներին՝ անպայմանորեն տեղադրել ցանցապատնեշներ: Գուցե կառավարության հատուկ որոշում է անհրաժեշտ, սանկցիաներ կիրառե՛ք…

«Անթերի» նախարարը պատասխանում է.

- Կառավարության որոշման կարիք չկա, քանի որ եթե ՀԷԿ-ի ծրագիրը հաստատվել է, այնտեղ պետք է եղած լինի նաև ձկնապաշտպան միջոցառումների մաս: Մենք դա կուսումնասիրենք, կտեսնենք, կքննարկենք, սանկցիաներ էլ կկիրառենք…

- Իսկ կարո՞ղ է մինչև ուսումնասիրեք, գետերում այլևս ձուկ չմնա:

- 2013թ. առաջին կիսամյակում կանենք:

- Մենք ամեն ինչ անում ենք, որ սխալներ թույլ չտվցվեն,- ավարտելով ասուլիսը հայտարարեց Տիգրան Սարգսյանի կաբինետի «անթերի» նախարարը՝ այնքան անթերի, որ բոլոր թերություններով հանդերձ, այդպես էլ պաշտոնանկ չի արվում՝ արդեն սպառնալով պաշտոնավարել «Իլյիչից Իլյիչ»:

Լուսինե Կեսոյան