«Հրապարակ». Ինչո՞ւ Սերժ Սարգսյանը չունի լուրջ մրցակից

«Հրապարակը» զրուցել է ԱԺ պատգամավոր Տիգրան Թորոսյանի հետ, ում հետ զրույցից մի հատված ներկայացնում ենք ստորև.

-Պարոն Թորոսյան, ինչպե՞ս եք գնահատում 2013 թվականի ընտրությունները՝ մասնավորապես ընդդիմադիր թեկնածու չունենալու առումով: Սպասելի՞ էր արմատական ընդդիմության նահանջը այս նախագահական ընտրություններին, եթե հիշենք, թե որքան խոստումնալից էր Լևոն Տեր-Պետրոսյանի վերադարձը մեծ քաղաքականություն, և ինչքան հույսեր էին կապում նրա հետ:
-Կարելի էր կանխատեսել, որովհետև լուրջ խնդիրներ կան բազմակուսակցական համակարգում, ցավոք սրտի, բազմակուսակցական համակարգը Հայաստանում դեռևս չկայացած՝ սկսեց այլասերվել: Մնացածը դրա հետևանքներն են: Այն, ինչ կապված է Լևոն Տեր-Պետրոսյանի վերադարձի հետ, չուներ անհրաժեշտ կազմակերպչական նախապատրաստություն և ուղղակի տարբեր կուսակցությունների ու մարդկանց նախընտրությունների վրա էր կառուցված, մինչդեռ իրական քաղաքական կյանքը կառուցված է լինում կուսակցությունների գործունեության վրա: Եվ քանի որ մինչ այդ վերադարձը անհրաժեշտ կազմակերպչական աշխատանքները չկային, ուղղակի մեխանիկական հանրագումար ստացվեց, տարբեր քաղաքական ուժերի և այլն, որոնք ևս կայացած չէին: Ստացվեց այն, ինչ պիտի ստացվեր: Դրանից ավելի մեծ արդյունք պարզապես հնարավոր չէր ունենալ:

-Պարոն Թորոսյան, ընդդիմադիր թեկնածուներն իրենց չառաջադրելու որոշումներում մեղադրում են իշխանություններին, թե մրցակցային հնարավորություն չի ստեղծում, և Սերժ Սարգսյանի նպատակն է վերարտադրվել դաշտն ամայացնելու ճանապարհով, Ի՞նչ եք կարծում ընդդիմությունը հետևողական պայքարով չե՞ր կարող ցանկալի արդյունքի հասնել և ստեղծել այդ մրցակցությունն իր իսկ մասնակցությամբ:

-Խնդիրը, որ գոյություն ունի Հայաստանում, այն է՝ իշխանությունը մեղադրում է ընդդիմությանը, ընդդիմությունը՝ իշխանությանը: Երկուսն էլ լավ չեն հասկանում, որ իրենք մեկ ամբողջական ու անբաժանելի համակարգի մի մասեր են՝ բազմակուսակցական համակարգի, ու հենց դա չպատկերացնելն է պատճառներից մեկը, որ բազմակուսակցական համակարգը չի կայանում: Բոլոր խնդիրներն էստեղ պետք է փնտրել, ոչ թե միմյանց մեղադրել տարբեր մեղքերի մեջ, բոլորի արածներն ու թերությունները պետք է շտկել՝ հասկանալով, որ բազմակուսակցական համակարգը, ինչպես արդեն ասացի, Հայաստանում դեռ չևավավորված այլասերվեց:  

-Սերժ Սարգսյանն առանց մրցակցի է գնում ընտրությունների, ի՞նչ կարգավիճակում է նա հայտնվել: Սա դյուրի՞ն ճանապարհ է, թե՞ հակառակը' ավելի մեծ պատասխանատվության առջև է նա կանգնած:
-Միգուցե դյուրին ճանապարհ՝ առաջիկա ընտրությունների տեսակետից, կարծում եմ, բոլորի համար ակնհայտ է, որ մրցակից չի ունենալու: Բայց մյուս կողմից վստահ եմ, որ երկրի առջև ծառացած են լուրջ խնդիրներ, մասնավորապես, բազմակուսակցական համակարգի կայացման առումով, և ակնհայտ է, որ այսօր, որպես նախագահ և որպես թեկնածու, որը, ցավոք սրտի, լուրջ մրցակից չի ունենալու առաջիկա ընտրություններում, գրեթե հաստատապես ապագա նախագահ՝ իրեն հուզելու են այս հարցերը: Եվ գլխավոր խնդիրներից մեկը, որը պիտի լուծի առաջիկայում, այստեղ լուծումներ որոնելն է:

-Պարոն Թորոսյան, ՀՅԴ-ի, ԲՀԿ-ի ու արմատական ընդդիմության թեկնածու չունենալը որակվեց որպես բոյկոտ 2013-ի ընտրություններին, համամի՞տ եք, որ սա բոյկոտ է:

-Իհարկե ոչ, և ի՞նչ բոյկոտ, ինչպե՞ս... Այդ նույն մարդիկ ընդամենը մի քանի ամիս առաջ, մի քանի շաբաթ առաջ բոլորովին ուրիշ տրամադրությունների մեջ էին, բոլորովին ուրիշ կանխատեսումներ էին արվում տարբեր քաղաքական ուժերի, գործիչների կողմից, ու այդ ամենը չի մոռացվել: Ցավոք սրտի, այդ ամենը հետևանք է նրա, ինչ արդեն ասացի, և այստեղ առանձնացնել կուսակցություններին , առանձին-առանձին դիտարկել,կարծում եմ՝ ճիշտ չի: Ընդհանուր խնդիր գոյություն ունի Հայաստանի բազմակուսակցական համակարգում: Այս հարցին պետք է կարողանան լուծում գտնել՝ որպես Հայաստանին գլխավոր մարտահրավեր առաջիկայի համար: