Վերանայվել և ընդունվել է սոցիալական փաթեթի հատկացման կարգը

Հայաստանի Հանրապետության կառավարության 2011 թվականի դեկտեմբերի 29-ի N 1917-Ն որոշմամբ հաստատվել էր «Սոցիալական փաթեթի հատկացման կարգը»: Հիշյալ կարգով նախատեսվում էր, որ սոցիալական փաթեթից կարող էին օգտվել մշակույթի ոլորտի պետական ոչ առևտրային կազմակերպությունների վարչական և մասնագիտական պաշտոններ զբաղեցնող աշխատակիցները: Այսինքն, հիշյալ կարգի համաձայն սոցիալական փաթեթից կարող էին օգտվել պետական ոչ առևտրային կազմակերպությունների ոչ բոլոր աշխատակիցները:

Այժմ, Հայաստանի Հանրապետության կառավարության կողմից վերանայվել և ընդունվել է սոցիալական փաթեթի հատկացման կարգն ու այն բարելավող դրույթներ է առաջարկել մշակույթի ոլորտի պետական ոչ առևտրային կազմակերպությունների աշխատակիցների համար:
Համաձայն նոր կարգի՝ սոցիալական փաթեթի շահառուներ են համարվում՝ մշակույթի ոլորտի պետական ոչ առևտրային կազմակերպությունների հաստիքացուցակով նախատեսված հաստիք զբաղեցնող անձինք, ինչեպես նաև չաշխատող, Հայաստանի Հանրապետությունում մշտապես բնակվող «ԽՍՀՄ» և ՀՀ «ԺՈՂՈՎՐԴԱԿԱՆ» պատվավոր կոչմանն արժանացած անձինք:

Հայաստանի Հանրապետության կառավարության կողմից ընդունված նոր որոշման նպատակն է բոլոր պետական ծառայողների, «Հանրային ծառայության մասին» Հայաստանի Հանրա­պետության օրենքի 2-րդ հոդվածի 1-ին կետով նախատեսված մի շարք մարմիններում տեխնիկական սպասարկում իրականացնող անձանց, ինչպես նաև մշակույթի և որոշ ոլորտների պետական ոչ առևտրային կազմակերպությունների աշխատողների համար ներդնել սոցիալական երաշխիքների միասնական համակարգ, որը կնպաստի աշխատողների սոցիալական կարիքների բավարարման որոշակի մակարդակին և աշխատանքային արդյունավետության բարձրացմանը:

Սոցիալական փաթեթը ներառում է հետևյալ ծառայությունները՝
1) առողջության ապահովագրություն,
2) հիփոթեքային վարկի ամսական վճարի մարում,
3) ուսման վճար,
4) հանգստի ապահովում Հայաստանի Հանրապետությունում և Լեռնային Ղարաբաղի Հանրա­պետու­թյու­նում: