Ա. Գեւորգյանն ընդունել է Համաշխարհային բանկի պատվիրակությանը

ՀՀ փոխվարչապետ, տարածքային կառավարման նախարար Արմեն Գեւորգյանը դեկտեմբերի 27-ին ընդունել է Համաշխարհային բանկի պատվիրակությանը՝ Հայաստանի սոցիալական ներդրումների ծրագրի ղեկավար Իվան Դրաբեկի ղեկավարությամբ: Հանդիպմանը մասնակցում էր նաեւ Հայաստանի սոցիալական ներդրումների հիմնադրամի գործադիր տնօրեն Աշոտ Կիրակոսյանը: Այս մասին հայտնում են ՀՀ ՏԿՆ Հասարակայնության հետ կապերի բաժնից։

Քննարկվեցին Հայաստանի սոցիալական ներդրումների ծրագրի շարունակման հետագա հնարավորություններին, իրականացման մեխանիզմներին, ՀԲ-ից բացի, այլ դոնորների ներգրավմամբ ծրագրի ֆինանսավորման դիվերսիֆիկացիային վերաբերող եւ այլ հարցեր: Ներկայումս իրականացվում է ծրագրի երրորդ փուլը, որը կավարտվի 2014թ. հունիսին:

Հանդիպման ընթացքում բարձրացվեց նաեւ զարգացման հաջորդ ռազմավարության մշակմանը վերաբերող հարցեր: Պայմանավորվածություն ձեռք բերվեց նշված հարցերը եւ ՀԲ-ի առաջարկությունները քննարկել նաեւ շահագրգիռ այլ մարմինների հետ:

Ի. Դրաբեկը փոխվարչապետին ներկայացրեց նաեւ հոկտեմբերի 24-25-ին Երեւանում անցկացված «Հայաստանի ու Մոլդովայի սոցիալական ներդրումների հիմնադրամների զարգացման հեռանկարները» խորագրով համաժողովի արդյունքները:

Զրուցակիցները կարեւորեցին Հայաստանի սոցիալական ներդրումների ծրագրի նշանակությունը՝ սոցիալական ենթակառուցվածքների եւ տարածքների համաչափ զարգացման առումով' երկուստեք ակնկալելով նման արդյունավետ համագործակցություն նաեւ առաջիկա տարիներին: