Ֆրանսիայում հայ տղան տաղանդների շոուի եզրափակչում զբաղեցրել է երրորդ տեղը

«Ֆրանսիան ունի անհավանական տաղանդներ» հեռուստատեսային նախագծի մեծ եզրափակչում, որը հեռարձակվում է «M6» հեռուստաալիքով, դեկտեմբերի 26-ի երեկոյան հայ պատանի Րաֆֆին զբաղեցրել է երրորդ հորիզոնականը՝ կատարելով Էլվիս Փրեսլիի երգը՝ ռիթմի անհավատալի զգացողությամբ: Այս մասին հաղորդում է Nouvelles d'Arménie-ն:

Միլիոնավոր հեռուստադիտողներ, այդ թվում ֆրանսահայ համայնքն ու հայաստանցիները, անհամբերությամբ սպասում էին նրա ելույթին: Րաֆֆին հմայել է հանդիսատեսին իր կատարման որակով եւ վիրտուոզ կերպով դաշնամուր նվագելով: Հեռուստադիտողների քվեարկության արդյունքում 12 հավակնորդների շարքում նա զբաղեցրել է պատվավոր երրորդ հորիզոնականը: Անկասկած, Րաֆֆին էլի բազմաթիվ մրցույթների կմասնակցի, քանի որ նա իսկապես անհավատալի տաղանդ ունի:

Հիշեցնենք, որ Րաֆֆին, ով աստիճանաբար բարձրացել է փառքի աստիճաններով, հանդիսատեսի քվեարկության արդյունքում այս նախագծի կիսաեզրափակչում հաղթել էր եւ անցել մեծ եզրափակիչ: Իսկ այս տարվա մարտին նա հանդես էր եկել Երեւանում՝ Պատրիկ Ֆիորիի համերգի ժամանակ, գրում է style.news.am-ը: