«Հրապարակ». ՀՅԴ-ն կոալիցիա չի մտնելու, որովհետև Սերժ Սարգսյանի հետ նրանց պայմանավորվածությունը երկաթյա է

Ինչպես տեղեկացնում են ՀՅԴ-ին մոտ «Հրապարակի» աղբյուրները՝ նախորդ օրը տեղի ունեցած Գերագույն ժողովը բավականին բուռն է ընթացել ու տևել է նախատեսվածից ավելի երկար:

Մինչև վերջին վայրկյանը շարքերը պնդել են, որ ընտրությունների պետք է գնալ սեփական թեկնածուով, սակայն ընկեր Հրանտի պահանջ-ելույթից հետո, որ իմաստ չունի գնալ և պարտվել, այդ 4-5 տոկոսը մեզ բան չի տալու. մասնակցելու դեպքում թերթերն ու ընդդիմությունն ասելու են՝ լեգիտիմացնում ենք իշխանության թեկնածուին, իսկ ընտրություններին չմասնակցելու ու չպարտվելու դեպքում ՀՅԴ-ն նոր դերակատարություն է ստանում ընդդիմադիր դաշտում, Լևոն Տեր-Պետրոսյանի և ՀԱԿ-ի վերջին որոշումից հետո դառնում է ընդհանրապես առաջնային, շարքերը լսելով՝ մասամբ զիջել են:

Ընդ որում, ընկեր Հրանտի տեսլականը քվեարկության ժամանակ հաղթել է ընդամենը 7-8 ձայնի առավելությամբ, ստացել 48 ձայն. հիշենք, որ ՀՅԴ ԳԺ-ինևասնակցել են 80 հավատավոր ընկերներ: Ի դեպ, ինչպես տեղեկացնում  են աղբյուրները, ՀՅԴ-ի առումով նախագահական ընտրություններից հետո իսկապես բավականին հետաքրքիր պասաժի ականատեսն ենք լինելու:

Ճիշտ է, ՀՅԴ-ն կոալիցիա չի մտնելու, որովհետև Սերժ Սարգսյանի հետ նրանց պայմանավորվածությունը երկաթյա է՝ իրենք մնում են իրենց «գծում», և այնպիսի առաջարկներ պետք է իրենց արվեն, որ, որպես ընդդիմություն, իրենք անխոցելի լինեն: Մյուս կողմից էլ, ՀՅԴ-ն չի ստանա այն ամենը, ինչ ինքը պահանջել է Սերժ Սարգսյանից' վերահսկիչ գործառույթներ' վերահսկիչ գերատեսչությունների ղեկավարմամբ, այնուհանդերձ, ՀՅԴ-ն նախագահական ընտրություններից հետո խիստ որոշակի քարտ-բլանշ կունենա շատ հարցերում և պաշտոններում»: