«Հրապարակ». Դեկտեմբերի 29-ից շուրջօրյա հերթապահություն ԿԸՀ-ում

ՀՀ նախագահի թեկնածուների դիմումները ԿԸՀ-ն ընդունելու է դեկտեմբերի 25-ից մինչև հունվարի 4-ը: Փաստաթղթերի ԿԸՀ հանձնումը, փաստորեն, համընկնում է ամանորյա տոների հետ: «Որպեսզի որևէ խոչընդոտ այս հարցում չլինի, դեկտեմբերի 29-ից նշանակել ենք շուրջօրյա հերթապահություն, և, բացի մի քանի վարչություններից, ԿԸՀ համապատասխան վարչություններն այդ օրերին կաշխատեն լիարժեք ռեժիմով, որպեսզի մեզ դիմող նախագահի ապագա թեկնածուները որևէ խնդիր չունենան փաստաթղթերը հանձնելիս»,- «Հրապարակ»-ին տեղեկացրել է ԿԸՀ նախագահ Տիգրան Մուկուչյանը:

Ըստ նրա՝ այդ օրերին նույն ռեժիմով են աշխատելու խնդրին առնչվող մյուս գերատեսչությունները ևս՝ ոստիկանության անձնագրերի և վիզաների վարչությունը, ինչպես նաև նոտարական որոշ գրասենյակներ, որոշվել է, որ այդ օրերին պետք է աշխատեն Կենտրոն վարչական շրջանի երկու նոտարական գրասենյակներ, որոնց պետերի հեռախոսահամարները նույնպես հրապարակվել են, և թենածուները ցանկացած պահի, ցանկացած խնդրով կարող են նրանց զանգահարել: Նրբություններ կան բանկային համակարգի հետ կապված, որովհետև հերթապահություն այդ հիմնարկներում հնարավոր չէ սահմանել այն պարզ պատճառով, որ բանկը նախևառաջ նշանակում է անվտանգության ծառայություն և հերթապահելու դեպքում պետք է աշխատի ողջ աշխատակազմով, ուստի, ելնելով օրենքի ընձեռած հնարավորությունից, ԿԸՀ-ն կարող է թեկնածուից փաստաթղթերը վերցնել մասնակիորեն՝ տասնօրյա ժամկետով տալով նրան, որ լրացնի փաստաթղթերը:

«Այս հարցն էլ տոնական օրերին փորձել ենք լուծել այդ կերպ»,- տեղեկացրեց Տիգրան Մուկուչյանը: