«Առավոտ». Հովիկ Աբրահամյանը հարգում է Տեր-Պետրոսյանի որոշումը

«Ես յուրաքանչյուր քաղաքացու որոշումն էլ հարգում եմ: Իսկ այս դեպքում՝ առավել ևս, առաջին նախագահի որոշումները նույնպես հարգում եմ»,- երեկ պատասխանելով «Առավոտի» հարցին՝ ինչպե՞ս կգնահատի ՀԱԿ առաջնորդ, ՀՀ առաջին նախագահ Լևոն Տեր-Պետրոսյանի՝ առաջիկա նախագահական ընտրություններում չմասնակցելու որոշումը, ասաց ՀՀ Աժ նախագահ Հովիկ Աբրահամյանը: Պարոն Աբրահամյանից թերթը հետաքրքրվեց՝ իր կարծիքով տարիքային ցենզը, որը նման որոշում կայացնելու համար դոմինանտ էր համարել Լևոն Տեր-Պետրոսյանը, իրակա՞ն պատճառն էր: Աժ նախագահը հակադարձեց. «Կլինի՞, որ ես իր փոխարեն չկարծեմ»:

Ի դեպ, ՀՀ Աժ նախագահ Հովիկ Աբրահամյանը նոյեմբերի 14-21-ը բավականին անսպասելիորեն մեկշաբաթյա արձակուրդ վերցրեց, որն անցկացնելու էր արտերկրում: «Անսպասելի» այն իմաստով, որ խորհրդարանական քառօրյայի աշխատանքներն էին ընթանում, Աժ նախագահն անգամ մեկ օր չհամբերեց՝ մինչև դրանք ավարտվեն: Այդ օրերին արձակուրդում էր նաև ՀՀ նախագահ Սերժ Սարգսյանը: Աժ նախագահի արձակուրդը նաև համընկավ ՀՀ երկրորդ նախագահ Ռոբերտ Քոչարյանի գրասենյակի տարածած հայտարարության հետ: Հիշեցնենք, որ Ռոբերտ Քոչարյանն անդրադարձել էր «Բարգավաճ Հայաստան» կուսակցության հայտնի առաջարկներին՝ անցում կառավարման խորհրդարանական համակարգի և 100 տոկոսանոց համամասնական ընտրակարգի: Բազում ենթատեքստեր ունեցող այդ հայտարարության մեջ երկրորդ նախագահը նաև ասել էր. «Հատկապես այն «խելամիտներին», այսինքն՝ նրանց, ովքեր ամենուր իմ ստվերն են փնտրում, կառաջարկեի՝ լավ բացել աչքերը, որպեսզի վերջապես տեսնեն, որ ԲՀԿ-ում հավաքվել է քաղաքական թիմ, որն ի զորու է ինքնուրույն ձևավորել կուսակցության քաղաքական օրակարգը»: Այդ օրերին մամուլում բազմաթիվ վերլուծություններ եղան, որ Քոչարյանն այդպիսով փորձում է կշիռ հաղորդել ԲՀԿ-ին, որ կարդալով հայտարարությունը՝ Սերժ Սարգսյանն արագ իր մոտ է կանչել Հովիկ Աբրահամյանին, որ այնուհետև Աժ նախագահը արտերկրում հանդիպումներ է ունեցել Գագիկ Ծառուկյանի և Ռոբերտ Քռչարյանի հետ:

Երեկ «Առավոտ»-ը փորձեց այս ամենի վերաբերյալ ստանալ Հովիկ Աբրահամյանի մեկնաբանությունները, թե ի վերջո՝ ի՞նչ կուլիսային իրադարձություններ էին զարգանում այդ օրերին, և արդյոք այս հանգուցալուծումը՝ ԲՀԿ-ի, ՀԱԿ-ի, ՀՅԴ-ի՝ նախագահական ընտրություններին մասնակցությունից հրաժարվելը, դրանց տրամաբանական ավա՞րտն էր: Վերջինս, ի պատասխան թերթի հարցի, ասաց. «Մի բան ասեմ՝ դա ընդմիշտ հիշեք՝ ես ում հետ կհանդիպեմ-չեմ հանդիպի, իմ տեսակետները դրանից չեն փոխվի: Կապ չունի՝ օդում կհանդիպեմ, ցամաքում, ջրի վրա, Քոչարյանի հետ կհանդիպենք, Ծառուկյանի հետ՝ ոչ մի բան իմ մոտեցումներում, իմ սկզբունքներում, իմ դիրքորոշումներում չի փոխվում: Իմ պարագայում ամեն ինչ հստակ է և պարզ: Ուզում եմ ասել՝ իմ բացակայելը կամ ներկա չգտնվևը ոչ մի անգամ չի փոխում իմ սկզբունքները, ու ես դա ապացուցում եմ գործերով, գործողություններով: Իսկ այդ շաբաթ բացակայել եմ անձնական հարցերով, ուրիշ ոչ մի բան չի եղել»: