Եգիպտոսի նախկին նախագահը բանտից տեղափոխվել է հոսպիտալ

Եգիպտոսի նախկին նախագահ Հոսնի Մուբարաքը Թորայի բանտից, ուր նա ցմահ ազատազրկման էր դատապարտվել, տեղափոխվել է Կահիրեի Մաադի շրջանի ռազմական հոսպիտալ. հինգշաբթի երեկոյան հայտնում են տեղական ԶԼՄ-ները:

Մի քանի ժամ առաջ Եգիպտոսի գլխավոր դատախազը համաձայնություն է տվել Մուբարաքի տեղափոխությանը՝ հոսպիտալում հետագա բուժումը շարունակելու համար այն բանից հետո, երբ նրան ցույց են տվել նախկին նախագահի առողջական վիճակի մասին հատուկ բժշկական հանձնաժողովի կազմած բժշկական եզրակացության մասին զեկույցը:

Նախկին նախագահը տեղափոխվել է հոսպիտալ շտապ օգնության մեքենայով մի քանի ոստիկանական մեքենայի ուղեկցությամբ:

Մուբարաքի առողջությունը վատացել էր այն բանից հետո, երբ նա լոգարանում սայթաքել և վայր էր ընկել՝ վնասվածնքեր ստանալով գլխին և կողերին:

Անցյալ շաբաթ Մուբարաքին արդեն մեկ անգամ տեղափոխել էին Մաադիի հոսպիտալ, ուր նա մի քանի ժամ էր մնացել և բուժզննում անցնելուց հետո անմիջապես վերադարձել բանտ: